Алия Фәйзрахманова: "Балалар белән эшләгәндә, кагыйдәләрне бозарга туры килә"

Хәзерге вакытта “Апуш” студиясе “Сәйдәш”, “Чулпан”, “Ленин” мәдәният үзәкләрендә актив эшчәнлек алып бара. Балаларга сәхнә теле, вокал, актерлык осталыгы буенча дәресләр бирелә.

–  “Апуш” балалар театрының төп максаты – балаларда татар әдәбиятына, татар теленә мәхәббәт уяту. Балаларга 4 юнәлештә белем бирәбез. “Апуш” балалар театр студиясенә 9-15 яшьлек балаларны сайлап алабыз. Кайвакыт балаларның мөләемлегенә каршы тора алмыйча, кагыйдәләрне дә бозабыз. Хәзерге вакытта “Апуш”та иң өлкән балага – 16, иң кечесенә – 7 яшь. Балалар атнасына 3 көн, 3әр сәгать шөгыльләнәләр. “Апуш”ларның барысы да искиткеч сәләтле балалар.

Алар мәктәптә “4”кә, “5”кә генә укыйлар, музыка мәктәбенә йөриләр, өстәмә түгәрәкләре дә бар. “Апуш”ка эләккәч, балалар үзләре белән бер дулкында булучылар мохитенә эләгә. Аларның сәләтләре ачылып китә. Хәзерге балалар стериотиплар белән яши. Ә “Апуш”та шөгыльләнүчеләрдә алар юк. Балалар үз шәхесләрен тоя башлыйлар. Башкалардан аерылып торудан курыкмыйлар, оялмыйлар, – дип әйтте “Апуш” студиясе җитәкчесе, сәхнә теле укытучысы Алия Фәйзрахманова.

Татар балалар театр студиясенең катнашучыларына дәресләрне тәҗрибәле театр артистлары, режиссерлар бирә. Иң мөһиме: барлык дәресләр бушка үткәрелә.

 – Театр сәнгате холык, тормышка караш, башкалар белән аралашуны формалаштыра. Балаларны сәхнәгә әзерләргә вакыт бик аз булды. Әмма аларның һәрберсенә шаккатырлык. Шунысы мөһим: балалар театр студиясенә әти-әни кушканга, вакыт уздырырга килмиләр. Минемчә, татар театр студиясенең түләүсез булувы да зур бәхет, – ди Г.Камал театры актеры, “Чулпан” мәдәният үзәгендәге студиядә актерлык осталыгы укытучысы Алмаз Сабирҗанов.

Барлык театрлар кебек үк “Апуш”лар да репертуар сайлауга бик җаваплы караганнар. Балалар өчен иҗат ителгән, яшь буынга кызык булырдай драма әсәрләренә кытлык сизелүенә дә тап булганнар.

– Остаз буларак, иң беренче һәм җаваплы мәсьәлә буларак репертуар сайлауны аерып әйтер идем. Һәрберебезнең балалар белән эшләү тәҗрибәсе бар. Башта балалар өчен пьеса кулай булыр дип уйладым. Ул сәхнә өчен рольләргә бүленеп язылган бит. Проза әсәрләренә куелган спектакльләрне  караганнан соң, фикерем үзгәрде. Прозадан да менә дигән спектакль ясап була икән. Без эксперемент формасында эшләп карадык. Һәрберебез ярты ел, 2-3 ай эчендә спектакль чыгарды. Алга таба балаларга озаграк эшләп, театр нигезе белемнәрен бирергә кирәк. Балаларны тиз арада зур сәхнәгә чыгарып имгәтүдән куркам. “Апуш” студиясе милләткә татарча фикер йөртә торган, телне камил белә торган балалар әзерли, – дип әйтте К.Тинчурин театры артисты, “Ленин” мәдәният йортындагы студиядә сәхнә теле, актерлык осталыгы остазы Зөлфия Вәлиева.

“Апуш” балалар студиясенә “Чулпан” мәдәният үзәгенә якын арада өстәмә кастинг оештырачаклар. Тагын 10 баланы театр дөньясына кабул итәчәкләр.

– Кастингта төп таләпләр: татар телен камил белү, аралашу, театраль сәләт булу. Минемчә, баланың үзендә “Апуш”ка эләгү теләге булырга тиеш. “Чулпан” мәдәният үзәгендә мюзикл юнәлеше буенча эшчәнлек бара, – дип искәртте Алия Фәйзрахманова.

“Апуш” студиясендә тәрбияләнүче Иркә Мингалиева да яраткан студиясенең бер яшен билгеләп үтүгә әзерләнә.

– Моңа кадәр бер дә театр дөньясына аяк басырмын дип уйламадым. “Апуш”ка килгәч, театрга мәхәббәт уянды. Мин "Сәйдәш" мәдәният үзәгендә шөгыльләнәм. Без бик бердәм, студиядә дуслар күп. Җыр-биюле чарабызда сезне көтеп калабыз, – дип әйтте ул.

13 март көнне 17:00 “Сәйдәш” мәдәният үзәгендә “Апуш” татар балалар театр студиясенең туган көненә рәхим итегез!