Атлар белән «җенләнгән» Илнур Әхмәтов: «Сабан туенда яулык бәйләргә дә ат калмаган иде»

29 яшьлек егет – шушы авылдан. Кечкенәдән атлар белән «җенләнә» ул. Җиде яшеннән авылдагы атлар фермасына гел барып йөргән. Тик колхоз таралгач, фермадан ат абзары гына утырып калган. Ташландык бу конюшняны Илнур иганәчеләр ярдәмендә төзекләндергән. Хәзер анда 13 ат, ике пони кайтарткан. Үсмерләр атлар янында мәш килсә, кечерәкләрне понилар кызыксындыра икән. Илнурның үзенең дә өч яшьлек олы кызы понида йөрер­гә ярата.

 – Атларга мәхәббәтем кечкенәдән килә. Әлмәттә ат спорты мәк­тәбен тәмамладым. Аннары шәхси компаниядә чабышкы атларда йөрүче булып эшләдем. Самара, Уфа, башка төбәкләрдә узган төрле ярышларда катнаша идем. Сабан туйларын калдырган булмады. Конкурс буенча икенче разрядлы чабышкы булдым. Әлеге ярышлар Олимпия спорт уеннарына да кергән. Яшьләр дә ат спортын белсеннәр өчен, авылда ат асрарга кирәк дигән нәтиҗәгә килдем. Үсмерләргә атлар белән шөгыльләнергә бар мөмкинлекләрне дә тудырырга телим, – ди Илнур.
 
Киләчәктә ул балалар һәм үсмерләр өчен ат спорты клубы булдырырга ниятли. Биредә шөгыльләнү бушлай булачак. Ә хәзергә атларны җигәр өчен асрый. Тиздән чана, матур кареталар кайтартырга хыяллана. Аннары арбалы атларда фотосессия ясарга мөмкин булачак. Туристлар өчен махсус атлы экскурсияләр уздыру нияте дә бар. Кареталы атларны прокатка биреп торырга да мөмкин булачак.
 
Тора-бара чабышкы атлар алыр­га уйлый. «Анысын тиз генә алып булмый әле. Нәселен, мөмкинлекләрен сынап сайлап алырга кирәк. Ләкин эзли башладым инде, Башкортстан, Татарстан якларыннан нәселле атлар караштырам»,– ди Илнур. Киләчәктә бәлки ипотерапия белән дә шөгыльләнә башлар. Атта йөрү ДЦП белән авыручы балаларга тернәкләнүдә булыша икән. Сәламәтлек өчен файдасы зур. Тиздән Илнур Әхмәтов атлар санын 60-70кә җиткерергә исәпли. Авылдашлары исә яшьләргә шундый мөмкинлекләр тудырганы өчен, атларны кабат Тайсуганга кайтарганына рәхмәтле.