Аварияле торактан күченгән Сәлмәновлар: «Тырышкан кеше түли ала, ялкауланмаска гына кирәк»

Сәлмәновлар моңа кадәр 1979 елда эш урыныннан бирелгән баракта гомер иткәннәр.
– Мин Мамадыш совхозында – бухгалтер, ирем мал табибы булып эшләде. Бер йортта ике гаилә яшәдек. Зур гына бакчабыз, мунчабыз, сараебыз бар иде. Тора-бара уңайлыкларны үзебез тудырдык, суын, газын керттек. Ләкин иске торак иске инде, тора-бара ул тагын да таушала. 2013 елда, «Гражданнарны аварияле торактан күчерү» программасы кысаларында ,яңа торак тәкъдим иттеләр, ризалаштык. Район башлыгыбыз Анатолий Ивановка зур рәхмәт, – дип искә ала Рәмзия Сәлмәнова.
Ныклап уйланылган адым була бу, шул ук вакытта ниндидер билгесезлек тә борчый аларны. Яшьлекләре узган, ике кызларын үстергән йорттан китүе җиңел булмый. «Ул йортларны сүткәннән соң да, бер ел тирәсе шул урамнардан узарга авыр иде», – ди Рәмзия апа. Ләкин якты, иркен, 64 квадрат метрдан артык мәйданлы зур фатирны күргәч, куркулар онытыла.

– Мунча булмаса да, җылы юыну бүлмәсе бар, хатын-кыз өчен аш бүлмәсе зур булу да мөһим бит инде, – дип сөенә хуҗабикә. Тузган торакларының бәясен яңа фатирларына беренчел кертем итеп түләгәннәр алар. – Тырышкан кеше түли ала, ялкауланмаска гына кирәк. Дөрес, кайбер нәрсәләрдән баш тартырга, акчаны кысыбрак тотарга да туры килде, ләкин балалар да ярдәм иткәч, бу авырлыкларны җиңеп чыктык. Шөкер, фатир кредитын түләп бетердек. Хәзер, шөкер, тыныч яшибез. Аллаһы тигезлектән, сәламәтлектән аермасын. Кызларыбыз да үз гаиләләре белән Мамадышта төпләнеп калдылар, алар безгә зур терәк.

Аварияле торакта яшәүчеләргә Татарстан Президенты каршындагы Дәүләт торак фонды хисабына төзелгән йортлардан фатир алу мөмкинлеге бирелә. Фатирларны ташлама белән, базар бәясеннән азрак суммага – 7 процент еллык ставка белән генә дә алырга була. Программада катнашучыларның элек торган тузган торагының квадрат метры якынча 11 мең сумнан сатып алына. Кайбер кешеләр, бу сумманың аз булуы белән килешмичә, йортыннан күченергә теләми. Яңа фатирга күченергә теләмәүчеләр, закон нигезендә, иске тораклары өчен бирелә торган акчаны гына алырга да хокуклы. Әмма, кызганычка, ул сумма яңа фатир сатып алырга җитми, шуңа да, дәүләт программасыннан файдаланып, ташламалы бәядән торак алуың күпкә отышлырак. Татарстанда әлеге дәүләт программасында 39 муниципаль район катнаша.