Авылда тик ятмыйбыз

Казаннан килгән кунаклар бизәнү буенча файдалы мас­тер-класслар уздырдылар, матурлыкны саклау серләрен ачтылар. Мулла Иле мәдәният йорты хезмәткәре Рәзинә Сәйфетдинова кунаклар өчен бер сәгатьлек концерт куйды. Мәдәнияткә, сәнгатькә битараф түгел безнең авыл халкы. Габдулла Кариев исемендәге татар дәүләт яшь тамашачы театры белән тыгыз элемтәдә торабыз. Бер ел эчендә аларның репертуарыннан «Нигез ташлары», «Ут чәчәге», «Кәҗүл читек», «Шәй бу, Шай бу» спектакльләрен карадык. Бу юлы үлемсез әсәр Мирхәйдәр Фәйзинең «Галиябануы»н күреп кайттык. Үзенчәлек­ле куелыш, декорация, режиссерның кабатланмас идеяләре, табышлары, күңелгә үтеп керә торган җырлар – барысы да безнең күңелгә хуш килде. Якташларыбыз – танылган артистлар Фернат Насыйбуллин, Илфат Габидуллин, Алсу Фәйзуллина белән дә горурланабыз. Авыл пенсионерларын, мәктәп укучыларын җылы каршы алганнары, ташламалы билетлар белән тәэмин иткәннәре өчен, әлеге театрның җитәкчелегенә зур рәхмәтләремне җиткерәсем килә. Шулай ук бу чараны оештыруда ярдәм күрсәткән Норлат балалар йорты директоры Дамир Рәхмәтуллинга, авыл башлыгы Ринат Баһаветдиновка, авылыбызда «Мөслимә» мәчетен төзетүче Чувашстан республикасының атказанган табибы Илгиз Хәйруллинга зур рәхмәт. Театр чынлап та яктылыкка, нурга илтә.

Авылыбызда утырмалар да саклана. Кышкы озын кичләрдә элек хатын-кызлар җыелышып кул эшләре белән шөгыльләнгәннәр, җырлап, эч серләрен бүлешеп утырганнар. Бу күркәм традиция, кызганыч, бүген онытылып килә. Ләкин Норлат мәдәният йорты хезмәткәрләре белән без бу йолаларны саклап калырга тырышабыз. Күптән түгел «Җырлы күңел» берләшмәсе утырмага җыелды. Бу юлы без калфак тегәргә өйрәндек. Бергә булганда, һәрчак күңелле.

Роза Яһудина, Яшел Үзән, Норлат.