Балык Бистәсендә көчле яңгыр елгаларны агызган: “Дөнья бетә дип торабыз”

20 июль көнне барча мөселманнар Корбан Гаетен билгеләп үтте. Көтеп алынган көн иде ул. Балык Бистәсе районында шул көнне җәй буе яумаган яңгыр да койган. Әби яңгыр тама башласа, “Рәхмәтле тамчылары белән яусын, бәла-каза китермәсен”, дип тели башлый. Олы Солтан авылы халкы теләк теләргә дә өлгермәгәндер...

Кичә, төштән соң бу авылда бик каты яңгыр явып уза. Елгадагы плотина чыдамый, аны су агызып китә. Нәтиҗәдә, дистәләгән кешенең бакчасы су астында кала.

Бүген кояш кыздыруга да карамастан, авылның су ташкын булып аккан өлешләре әле дә юеш. Ә басу юлы бөтенләй дә кипмәгән иде.

- Башта аз гына явып китте. Аннан туктады. Бераздан тагын килде. Кыш көне буран ничек булса, бу да шулай яуды. Күршеләрнең йортлары да күренмәде, хәтта. Бозы да булды. Яшенне күрсәгез сез! “Чыбыркы” яшен, китерә дә бәрә.

Без кечкенә вакытларда, күрше авылда бер кыз агып киткән иде. Көтүләр ага иде. Әмма шуннан бирле язын да, җәй дә мондый ташуларның булганын хәтерләмим, - ди шул авылда яшәүче Галимә апа Гарифуллина.

Кичә дә Олы Солтанга яңгыр көтмәгәндә килгән. Сәгать ярым эчендә бөтен авыл халкын хафага сала ул.

- Парникларның ишекләрен ябарга өлгермәдем. Аны җил эчкә каерып керткән. Әле бүген дә рәтли алмадык. Өй алдында чебиләрем бар иде. Аларны да җыеп керә алмадым. Яңгыр агызып китмәсә ярар иде дип куркып утырдым.

Бакчадагы карлыган куакларының очы гына күренеп тора иде. Бу гөнаһларыбыз өчендер инде дип, куркып тордык. Тамаша булды! Дөнья бетә дип торабыз, - дип кичерешләре белән уртаклашты Галимә апа.

Галимә апаларга әле бәхет елмайган. Ә менә елгага якын яши торган Хәкимә апа Ибраһимоваларның су өенә үк кергән. Без барганда алар кичәге гарасаттан соң өй эчен чистарту белән мәшгуль иде.

- Дүртләр тирәсендә булды бу хәл. Котыбыз алынды. Үзебез дә өйдә идек. Су баса башлаганын күргәч, бакчадагы помидорларны җыярга керештем. Хәзер әнә алар та пычрак эчендә утыра. Бакчам бик матур иде, күз дә тиде ахры инде. Өй эчендәге күп нәрсә яраксыз хәзер. Җиһазларны ташларга туры киләчәк. Бер сәгать эчендә бөтен нәрсә бетте. Ургылып-ургылып килде ул, куркыныч итеп. Язгы ташу вакытында да болай булганы булмады. Өебезгә язын да су беркайчан да кермәде, - ди Хәкимә апа.

Өй тирәли салган яңа фундаментка кадәр зыян килеп, йортны бер якка авыштырган. Өй эчендә дә хәлләр шәптән түгел. 2-3 сәгать торган 30-40 см биеклектәге су идәннәрне күтәргән, хәтта. Бу аның әти-әнисенең нигезе. Әмма кызы туган йортын ташламый, карап тора икән.

- Әтием Бөек Ватан сугышы инвалиды, бер кулы юк иде. Үлгәндә, васыять итеп калдырды. Өйне сатмагыз да, сүтмәгез дә, диде. Мин аның сүзеннән чыгарга куркам. Ноябрьдә Казанга китәм, апрельдә кире кайтам. Өйне ташлыйсым, әти сүзеннән чыгасым килми. Монда минем әтием торган, бабам торган. Аларның васыяте итеп мин кайтып йөрим. Беренче тапкыр шундый хәлдә калдык, - ди Хәкимә апа.

Бәхеткә, өйләре дә, мунчалары да иминиятләштерелгән булган. Мунчаның да идәннәрен су урыныннан кузгаткан. Анда тора торган кер юу машинасын бөтенләй әйләндереп ташлаган.

Хәкимә апа фаразларынча, платина китүдә көчле яңгыр гына түгел, ә кондызларның күплеге дә сәбәпче булуы ихтимал.

Яңгыр Олы Солтаннан ерак түгел урнашкан Шитнәү -Чирмешән авылында яшәүчеләрне дә читләтеп узмаган. Анда да бакчалары су астында калучылар бар. 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от Шәһри Казан (@shahrikazan)