“Бармакларыгызга нәрсә булды?” дигән сорауга, Татьяна Навка: «Бу бит спорт, ә спортта ни генә булмый!” дип елмайды

 
Людмила ролен Татьяна Навка үзе башкара. Руслан ролен спортчы Петр Чернышевка биргәннәр.
-Мин бу идея белән инде күптән янып йөрдем. Кызыма әкият укыган вакытта, нишләп әле “Руслан белән Людмила”ны боз өстенә чыгармаска дип уйлана башладым. Әлеге әкиятне кинога да күптәннән төшергәннәре юк. Соңгы фильм 1976 елда күрсәтелде. Мәскәүдәге премьерадан соң спектакльне караган балаларның ата-аналары яныма килеп рәхмәт әйтә башлады. Безнең шоуны тамаша кылып кайткач, алар Пушкин китапларын укый башлаган. Дөресен әйтим, мин үзем дә әзерлек вакытанда Пушкинны, аның әлеге поэмасын яңа яктан ачтым, - ди Татьяна Навка. 

Сүз уңаеннан, спортчының ике кызы да тормышларын фигуралы шуу белән бәйләргә теләми икән.

-Олы кызым, ни гаҗәп, математик булып китте. Хәзер МГИМОда белем ала. Кече кызым фигуралы шуу белән дә, балет белән дә шөгыльләнә. Чит телләр өйрәнә. Балерина буласым килә, ди. Әле аңа дүрт кенә яшь бит. Бәлки тормышын спорт белән дә бәйләр, - ди Навка. 

Боз өстендә төрле тамашаларны Дю Солей циркы да ясый башлаган. Алардан аермалы буларак, Россия шоулары спортка күбрәк тартым икән. 
-Без тамашабызда фигуралы шуудагы бөтен катлаулы алымнарны кулланабыз. Анда өчле аксель дә, сальтолар да бар, -ди Руслан ролен башкаруыннан тыш, әле шоуның хореографы да булган Петр Чернышев.
Казанга Татьяна Навка үзе генә түгел, әнисе белән килгән икән.
-"Мин дә синең белән Казанны карап кайтам" диде ул. Аның әле сезнең шәһәрне күргәне юк. Иртәгә шәһәр буйлап экскурсиягә чыгабыз, - ди спортчы.  

Журналистлар белән очрашуга чыккан вакытта Татьяна Навканың кулындагы бармаклары бинтка бәйләнгән иде. Каләм ияләренең “Бармакларыгызга ни булды?” дип кызыксынуына Татьяна: «Бу бит спорт, ә спортта ни генә булмый!” дип елмайды. Җәрәхәтләнүенә карамастан, бер сәгатьтән соң ул инде тамашачысы янына боз өстенә чыкты.  

 Мюзикл авторлары тамашачыда Александр Пушкин поэмасына яңа, заманча караш булдырмакчы. Шулай итеп боз өстендә сөйләшә торган зур баш, Черноморның зур сакалында очучы актерлар, фейерверк кебек тамаша карап булачак. Музыкаль партияләрне Филипп Киркоров (Черномор), Ани Лорак (Людмила), Александр Панайотов (Руслан) кебек танылган артистлар тавышландыра. 

 

Кире Мәскәүгә кайткач, Татьяна Навка чираттагы премьерага әзерләнә башлаячак. Киләсе елга ул безгә “Аленький цветочек» әкияте белән килергә мөмкин. 

фото -  Ильнар Тухбатов