Азнакай районының Әгер авылында яшәүче тыл хезмәтчәне, хезмәт ветераны Рәзинә Арслан кызы Гәрәева үзенең 100 яшьлек күркәм юбилеен билгеләп үткән.
Йөз яшь – кеше гомере генә түгел, ә тулы бер чор. Рәзинә апаның тормыш юлы да ил тарихы белән үрелеп барган: сугыш еллары, хезмәт, гаилә, балалар һәм оныклар бәхете...
Рәзинә Арслан кызы 1926 елның 1 июлендә Азнакай районының Әгер авылында күп балалы гаиләдә дөньяга килгән. Җиде сыйныф тәмамлаганнан соң, авыр сугыш елларында өлкәннәр белән иңгә-иң куеп хезмәт иткән. Терлек караган, басуда эшләгән, ә нибары 16 яшендә трактор руле артына утырган. Ир-егетләр фронтта чакта авыл хуҗалыгының бөтен авырлыгы яшь кызлар җилкәсенә төшкән. Рәзинә апа да сынатмаган, туган җиренә намус белән хезмәт иткән.
1945 елда ул Йосыф ага белән гаилә корган. Алар дүрт бала тәрбияләп үстергән. Сугыштан соңгы елларда да Рәзинә Арслан кызы хезмәттән аерылмаган. Лаеклы ялга чыкканчы «Авангард» колхозында төрле хезмәтләрдә эшләп, авыл хуҗалыгы үсешенә зур өлеш керткән.
Бүген Рәзинә апа – сигез оныгы һәм сигез оныкчыгы өчен кадерле әби, гаиләсенең терәге һәм киңәшчесе. Аның зирәклеге, сабырлыгы, хезмәт сөючәнлеге яшь буын өчен дә үрнәк булып тора.
Күркәм юбилее уңаеннан ветеранны Азнакай районы башлыгы Марсель Шәйдуллин, Тымытык авыл җирлеге ветераннар советы җитәкчесе Радик Солтанов, туганнары, авылдашлары һәм якыннары тәбрикләгән. Район башлыгы юбилярга Россия Президенты һәм Татарстан Рәисенең котлау хатларын, шулай ук истәлекле бүләкләр тапшырган.
— Рәзинә Арслан кызына озын гомерендә куйган хезмәте, рухи көче, еллар буе кешеләргә күрсәткән игелеге өчен зур рәхмәт. Аның тормыш юлы – яшьләр өчен үрнәк, – дигән Марсель Шәйдуллин.
Ветеранны хөрмәтләү «Бердәм Россия» партиясенең «Өлкән буын» федераль проекты кысаларында узган.
Йөз еллык гомер юлына күз салганда, Рәзинә апаның язмышында буыннарга үрнәк булырлык кыйммәтләр чагыла: хезмәткә тугрылык, гаиләгә мәхәббәт, сабырлык һәм тормышны ярату. Авырлыкларны җиңеп узган буын вәкилләре бүген дә күңел җылысын югалтмыйча, тирә-юньдәгеләргә өмет һәм көч биреп яши.
Рәзинә Арслан кызына ныклы сәламәтлек, күңел тынычлыгы, балалары, оныклары һәм оныкчыкларының хөрмәтен тоеп, кадер-хөрмәттә яшәргә язсын.
Кызыклы яңалыкларны күзәтеп бару өчен безнең МАХ каналына кушылыгыз.
Лилия Гайнуллина
Комментарийлар