Бүген көндезге 12:15тә бер минутлык тынлык игълан ителә

Ил тарихына иң кайгылы көннәрнең берсе булып кереп калган, кара хәрефләр белән язылган 22 июньне Хәтер һәм кайгы көне буларак билгеләп үтәбез. Нәкъ шул көнне, 1941 елның 22 июнь таңында, фашист Германиясе илебезгә бәреп кергән. 1418 көн һәм төн дәвам иткән канкойгыч сугышта СССР 27 миллионлап кешесен югалткан. Хәтер һәм кайгы көнендә күп кенә илләрдә дәүләт флаглары төшерелә, сугыш корбаны булучылар искә алына.

Быел Хәтер һәм кайгы көнендә бер минутлык тынлык та игълан ителәчәк. 22 июньдә, 12:15 сәгатьтә. Очраклы түгел, чөнки 1941 елның 22 июнендә дә шул ук вакытта Советлар Союзы хөкүмәте халыкка фашистларның илебезгә басып керүе турында мөрәҗәгать белән чыга.

Кыска гына вакыт эчендә гадәти тормыш тулысынча тукталып, бер минутлык тынлыкка кушылачак. Хәтер хөрмәтенә. Вафат булучылар, сугыштан кайта алмаучылар, мәрхүмнәр, корбаннар хөрмәтенә. Эфирда исә Игорь Кириллов тавышы яңгыраячак...