Блогер Фәридә Зиннәтова: “Серем юк – өтере-ноктасына кадәр әйтәм”

– Мондый хәлләр булыр, интернет аша эшләп китәрбез дип уйламадым да. Зур кызым блогер булгач, бераз чамалый идем. “Ут хатын” Гүзәл Хөснетдинованың әнисе мин. Баштарак аларга карап та өйрәндем, аннан үземнең пешергән ризыкларымны куя башладым. Кеше кызыксынып китте. Язылучылар җыярга кызларым да булышты. Лилия кызым кафе ачып җибәрде, тагы да блогерлык эшебез көчәеп китте, – дип сөйли Фәридә апа.

Аннан олы кызына карата кызыксыну башланганын сизгәч тә, төрле хисләр кичерә ул. 
– Кызык иде. Кызыгып та куйдым. Гүзәл белән Казанга баргач, “Ай, Гүзәл, сезнең белән фотога төшәргә ярыймы, дип килеп дәшәләр. Әни кеше буларак та күңелем булды. Хәзер инде үземнән дә шулай сорыйлар, – дип сөйли ул. 

Гадәттә интернетта күп кеше үзенә кирәкле әйберне эзли, таба. Фәридә ападан да күбрәк аш-су рецептлары сорыйлар икән. Ә Фәридә апаның беркайчан да алардан берни яшермәгәне юк. “Карыйм, эзли, үзгәртәм. Яңалыклар кертәм. Аннан сынап караганнан соң кызларга тәкъдим итәм. Кафе булгач, Лилия кызымныкын әйтә алмыйм. Үзем уйлап чыгарып ясаган рецептларны халыкка күрсәтәм, сөйлим”, – ди блогер ханым.

Фәридә апа гомер буе пешекче булып эшләгән кеше. Башта институтта пешекче, аннан аны шул ук өлкәдә җитәкче итеп куялар. Аннан соң мәчеттә аш-су буенча җитәкче итеп билгелиләр аны. 
– Хисапчы булырга укыган идем, әмма кечкенәдән пешерергә яраттым. Хәзер башка дөньяда яшәгән кебек. Бик кызык, сәяхәтләребез күбәйде, аралашулар артты, – дип сөйли Фәридә апа.

Интернетта кайнау гына түгел, күп блогерлар үзара аралаша, хәтта бер-берсенә кунакка да йөрешә башлый икән. Халык белән дә элемтә дә шәп: туры элемтәне дә күп кеше карый, директка да хатлар күп килә, ди блогер. Фәридә апа үзе пешергән төрек ризыгы – кунафане ашарга махсус килүләрен сөйли. Бигрәк тә Чистай мөселман кызлары үз итә икән аны. 
– Бисмиллә әйтеп пешерсәң, бөтен ризык тәмле була. Беркайчан да сер саклап калдырмыйм. Берни яшермим. Аллаһы Тәгалә яшерергә кушмаган. Рецептымны бирәм икән, өтере-ноктасына кадәр әйтәм. Рәхмәт әйтеп язалар, – ди Фәридә апа.