Буа районында фаҗигале янгын: «Гомере үкенечле үлемнән өзелде...»

Ялгышларны ут-күз кичерми, чак кына саксыз кыландыңмы ялкын өермәсе дилбегәсеннән ычкына. Бу юлы да шулай кылангандыр кебек. Буа районының Черки-Гришино авылында ялгызы гына яшәүче 63 яшьлек Гәрәй Гайнетдинов үз йортына ут капканын сизми дә кала, хәтта көтелмәгән шушы бәладән котылырга да җитешми...

Урындагы хәлләрне белешергә теләп, авыл җирлеге башлыгына шалтыраттык. Элек тә төрле гозер белән шалтыратканым бар иде аңа, ләкин уңай сүзне ишеткәнем булмады, ошбу юлысында да искәрмә ясалмады. Гаҗәп, авыл проблемаларына, җирлек халкына карата мөнәсбәте ниндиерәк икән аның?

Аның каравы авыл халкы ачык йөзле! Авылдашларына битарафлык күрсәтмәделәр. 
– 5 март көнне кичке сәгать җиделәрдә Гәрәй йортына ут капканын, бәхеткә мәчеткә тәрәвих намазына баручы Наил исемле күрше егете күреп алган, юкса гәүдәсе ут эчендә калып, йорты белән бергә дөрләп янасы булган икән... Наил күршесе Фидаилне чакырып, икесе бергә төтен ерып эчкә кергәннәр. Алар аны исән килеш алып чыгарбыз дип уйлаганнардыр инде, күрәләтә торып кеше яндырмыйлар бит. Гәрәйнең язмышы катлаулы булып чыкты шул... Өйләнеп тә караган иде, уңмады. Ялгыш сукмакларга кергән чагы да булды, дөньялыкның үзенә тигән авырлыгын күрде инде ул балакай, хәзер җаны тыныч җирдә, урыны оҗмахларда булсын, – ди Дания апа.

Гәрәй Гайнетдиновның өенә газ кермәгән. Кышкы якта ул түр якны ябып кечерәк якта гына яшәгән. Өен миченә утын ягып җылыткан. Ләкин ул көнне нәрсә бугандыр, янгын каян чыкканын кем дә белми, тикшерү нәтиҗәләре әле билгеле түгел. 
– Наил белән Фидаил аны күтәреп алып чыкканда, ис тиеп өзелгән булган шул инде. Янгын сүндерү машиансы килеп җиткәнче, ишегалдына чыгарып салганнар мәетен. Киемнәренә ут элә язган, диделәр. Әле яшәрлек егет иде, пенсиягә чыгарга да җитешмәде. Шул көнне аны моргка алып киткәннәр, икенче көнне җирләделәр. Гәрәйнең бертуган абыйсы белән ике апасы Чаллыда яшиләр, алар кайтып соңгы юлга озаттылар. Фатих абый балалары инде алар, нәселләре әйбәт, Гәрәйне дә ташламадылар, гел кайткалап йөрделәр анысы. Ләкин нишләтәсең инде, гомере үкенечле үлемнән өзелде, – ди Дания апа. 

Ут-күздән сак булсак иде.