Булат Минһаҗев: «Халыкка сыйфатлы ризык ашатасым килә»

Ул үзе югары уку йортында техник кибернетика белгечлеген үзләштергән. Төп эше дә шул өлкә белән бәйле. Кече Шыр­дандагы нигезләре буш калгач, аталы-уллы Минһаҗевлар, чиратлашып, авылга кайтып тора башлаганнар. Биш-алты ел элек беренче тапкыр 100 күркә алганнар. Аннары күркәләргә каз, үрдәк тә өстәлгән. «Тора-бара 500 йомыркага исәпләнгән үз инкубаторыбызны да булдыр­дык», – ди Булат. 

Минһаҗевлар яңа елга кадәр каз сата. Декабрь, ноябрьгә ка­дәр күркә чалалар. Булатның 350 бройлер тавыгы бар. Ин­кубатор өчен йомыркаларны Чехиядән махсус кайтарта икән. 60 көн дигәндә, тавык­лар ин­де суяр­лык булып җитешә. Авыр­лык­лары 2 килодан артык була, ди.

Тавык-чебешкә ашый торган ризыкны егет үзе әзерли. «Ризык­ка кукуруз, бодай, арпа, акбур, акшар кушам. Көнбагыш та бик файдалы. Катнашмага тоз, балык мае өстим. Барысын да тегермәннән тарттырам, катнашманы он хәленә китерәм», – ди Булат.

Йомырка сала торган тавык­лар аерым. Хәтта берьюлы 200әр йомырка сатып алучылар да бар икән. Тавыклар көненә 60лап йомырка сала, ди. Кош-кортлардан тыш, умартачылык белән дә шөгыльләнә Минһаҗевлар. Әле тагын 15 баш сарыклары да бар.

– Мин кечкенәдән авылда идем. Сессияне төгәллим дә дәү әни янына ашыгам. Кыскасы, авылны ярату каныма балачактан сеңгән, күрәсең. Бу эш күңелемә ошый, беренчедән, син үз-үзеңә хуҗа, икенчедән, авылда саф һава, өченчедән, халыкка чиста продукт тәкъдим итүемә сөенәм, хәзер экологик яктан сыйфатлы продукт белән туклану мөһим. Күп кеше аллергиядән интегә, антибиотиклар кушылмаган, чиста ризык һәркемгә файдалы, – ди егет.

Булат «Шырдан экопродукты» дигән бренд та булдырган. «Сарафан радиосы» аша әлеге ризык­лар турында тирә-юньдә дә ишетеп беләләр. Хәтта Мәскәүдән кайтып, Шырдан казын сораучылар бар икән. «Анда каз ите өч тапкырга кыйм­мәтрәк йөри, шуңа да бездән алып китәләр», – ди әңгәмәдәшем.

Киләчәктә, Булат экологик чис­та продукция җитештерү белән генә чикләнмичә, экотуризм­ны үстерергә хыяллана. Бабасы нигезен матурлап, ял итәр өчен бар уңайлыклар тудырып, турист­ларга ял итү урыны булдырыр­га исәбе.

– Шәһәр кешесе каз белән үрдәкне дә аермый бит. Аларны авыл тормышы белән якыннан таныштырырга мөмкинлек булыр иде. Җиләк-җимеш ашап, авылдашыбыз, күренекле мәгърифәтче Каюм Насыйри рецепты буенча әзерләнгән чәйләр эчеп, ул атлаган эзләрдән йөреп, рәхәтләнеп ял итәр иде бездә туристлар, – ди Булат.

Хыялларың тормышка ашсын.

Булатның әнисе Гүзәл Минһаҗевадан Каюм Насыйри рецепты буенча әзерләнгән чәй рецепты 
– Безнең әби: «Туган якта үсә торган җиде төрле шифалы үләннән ясап эчкән чәй тәмле була», – дип әйтә иде. Каюм Насыйри рецепты буенча ясалган чәйнең рецептында, нигездә, яшел карлыган. Гөлҗимеш, карлыган яфрагы, бөтнек тә кушыла. Соңгы елларда мари милләтеннән булган бер кеше миңа лофант дигән үсемлек орлыгы биргән иде. Аны Тибет монахлары бик яратып кулланалар, ди. Чәйгә аны да куша башладык. Безгә дә бик ошый, файдалы да, тәмле дә.