#Язмалар 11 март 2019, 16:12

«Ел укытучысы» кем булыр?

11 март 2019, 16:12

Татарстан Республикасының “Ел укытучысы” 15 март көнне билгеле булачак. Бу атнада финалга чыккан мөгалимнәр һөнәри осталыкларын күрсәтәчәк. Республика турын узган мөгалимнәр “Россия ел укытучысы” исеме өчен көрәшәчәк.

Скопировать ссылку

Бәйге ике номинация буенча бара. Беренчесендә укытучылык стажы өч елдан артмаган яшь мөгалимнәр “Педагогик дебют” номинациясендә көч сынаша. “Ел укытучысы” исемен алу өчен укытучы кимендә биш ел белем бирергә тиеш. Бәйгедә барлыгы 145 укытучы катнашса да, финалга бары тик 25е генә чыгачак.

Быел илнең алты төбәгендә бәйгене яңа шартлар буенча үткәрәләр, Татарстан да экспериментка кушылган. Әйтик, кичә укытучылар жюри әгъзаләре каршында “Ачык дәрес” оештырды. Бүген дәрестән тыш биремнәрдә сыналалар. 15 мартта исә Татарстанның мәгариф һәм фән министры Рафис Борһанов белән очрашу булачак.

“Ел укытучысы” бәйгесе белән беррәттән Россиянең “Иң яхшы татар теле һәм татар әдәбияты укытучысы” бәйгесе дә бара әле. Финалга Азнакай, Алабуга, Арча, Мөслим, Тукай, Алекссевск, Норлат, Мамадыш, Әлмәт, Саба, Кукмара, Сарман, Апас районнарыннан 20 укытучы чыкты. Татар теле һәм әдәбияты укытучылары арасыннан иң яхшысын шулай ук 15 март көнне ачыклаячаклар.

“Ел укытучысы” бәйгесе Россиядә 1992 елдан бирле үткәрелә инде. Укытучыларны олылый торган шундый ук бәйге АКШ, Австралия, Бөекбритания, Украина, Белоруссия, Молдавия һәм Украинада да бар.

Кызыклы яңалыкларны күзәтеп бару өчен Т елеграмга кушылыгыз.

#“Ел укытучысы”