#Язмалар 19 декабрь 2018, 09:37

Элвин Грей концертында гадәттән тыш хәл килеп чыккан: балалар елаган, халык урамга ыргылган

19 декабрь 2018, 09:37

Кичә Азнакай шәһәрендә популяр җырчы Элвин Грейның концерты вакытында күңелсез хәл килеп чыккан. Бу хакта җырчы үзенең Инстаграмында хәбәр итә.

Скопировать ссылку

Элвин Грей концертында гадәттән тыш хәл килеп чыккан: балалар елаган, халык урамга ыргылган

- Билгесез номердан “Бинага шартлаткыч куелган һәм тиздән ул шартлау булачак”, - дигән хәбәр алынды. Тиз арада Эчке эшләр министрлыгы хезмәткәрләрен хәбәр иттек. Алар өч минут эчендә килеп җитеп, кешеләрне эвакуацияләделәр. Һәм шунда ук хокук бозучыны да ачыкладылар. Аларның мәгълүматлары буенча, телефон номеры психик диспансерда учетта торучы кешенеке булып чыккан. Тиздән концертны дәвам иттек. Хәзерге вакытта бу эш буенча тикшерү бара, җинаять эше ачу буенча мәсьәлә хәл ителәчәк. Хокук сакчыларына профессиональ эшләре һәм оперативлык өчен рәхмәт. Ә тамашачыларыбыздан гафу үтенәбез, - диелгән әлеге хәбәрдә.

“ШК” хәбәрчесе концертта булган тамашачы Ләйсән Гайсина белән аралашты.

– Бу хәл концерт башланып, бер сәгать узгач килеп чыкты. Без башта аңышмый да калдык. Эвакуация башлану турындагы хәбәр алынганда, Радик үзе дә сәхнәдә иде. Үзе дә аңламыйча калды шикелле. Ул: “Унбиш минутлык тәнәфес”, - дип кенә әйтә алды. Халык башта акрын гына урыннарыннан тора башласа, бераздан чыгу юлына таба кызу-кызу йөгерешә башлады. Балаларның елаган тавышлары да ишетелде. Без үзебез дә туганнар, балалар белән барган иде. Шуңа күрә беренче чиратта үзем өчен түгел, балалар өчен курыктым. Паникага бирелергә тырышмасак та, күңелдә курку, шикләнү булды. Һәм моннан соң андый җирләргә балалар белән бармаска кирәк, дигән нәтиҗәгә килдек. Әле ярый бу юлы барысы да менә шулай тәмамланды. Алла сакласын, ул-бу була калса, берни дә эшләп булмый икән. Концертны ахырына кадәр карап бетермәдек инде. Кәеф төшкән иде, кайтып киттек, - диде Ләйсән Гайсина.

Фото: җырчының инстаграм аккаунтыннан алынды