«Эшмәкәрләре булмаган авылның бүгенгесе юк»

Чувашиянең «Слава Картофелю» җаваплылыгы чикләнгән җәмгыяте башкарма директоры Рамил Идиатуллин бүгенге көндә 5 мең гектар җирдә бәрәңге һәм бөртеклеләр үстерә. 
- Яңа сорт бәрәңгеләр үстерү белән шөгыльләнәбез. Заманча технологияләр белән җиһазландырылган саклагычлар эшләттек. Үз лабораториябез бар. Бәрәңге үстерү буенча федераль программага кердек. Ил буенча ул программада 19 компания катнаша, шуларның берсе – без, - диде ул горурланып. 
Эшмәкәр әйтүенчә, авыл кешесенә эш урыны булдыру җиңел түгел. Шулай да үзләренең компанияләрендә алар 230 кешене эшле иткән. 
- Авылдашыбыз Ркаил Зәйдулла «эшмәкәрләре булмаган авылның бүгенгесе юк» дигән иде. Шөкер, авылыбыз алга бара. Юллар салдык, балалар мәйданчыгы эшлибез. Мәктәп тә, мәчет-мәдрәсә дә гөрләп эшли. Авыл халкы белән дус-тату яшибез, - диде ул.