«Эвакуатор артыннан йөгереп, йөрәк өянәгеннән үлүчеләр саны артуы күзәтелә»

– Шартнамә кабат кабул ителмәде, шунлыктан Татарстан Конституциясен дә гамәлдән чыгарырга кирәк. Дәүләт эчендә дәүләт була алмый, имеш. Менә шушындый мөрәҗәгатьләр таратучы сәер кешеләр дә бар. Депутат бит әле җитмәсә, – дип кискен тәнкыйтьләде Чаллы депутатын Татарстан Республикасы Дәүләт Советының законлылык һәм хокук тәртибе комитеты рәисе Шакир Ягудин 15 декабрьдә узган матбугат конференциясендә.

Быел Татарстан Республикасы Конституциясенә 25 ел булды. Киләсе, ягъни 2018 елның 27 маенда ТАССР төзелүгә 100 ел тула.
– Татарстан Конституциясе –республикабызның төп документы ул, – дип, янә зур әһәмият биреп, кабатлап әйтте Шакир Ягудин.
Милли җанлы Чаллы халкы капчык эчендә «кара мәче» ятканлыгын сайлаулар вакытында сизенмәгән, күрәсең.

– Мәскәү хәл итә мәгариф мәсьәләләрен. Без – татарлар – үзебез яхшылап өйрәник ана телебезне. Башка милләтләр аралашу дәрәҗәсендә генә өйрәнсен, әгәр теләкләре булса. Мәҗбүриләү кирәкми, башка милләттәгеләргә татар телен өйрәнү-өйрәнмәү ирекле булсын. Рус теле статусы билгеләнгән. Милли телләрнең дә статусын күтәрү кирәк, – дип җавап бирде Шакир Ягудин, татар теленә кагылышлы сорау биргәч.
– Россия Федерациясе Президенты Владимир Путин Мәскәүдә 14 декабрьдә узган матбугат конференциясендә, ил төбәкләрен кушу-эреләндерү булмаячак, милләтләрне сакларга һәм үстерергә кирәк, дип, үзе дә әйтте, – дип белдерде ул. – Адыгей республикасын Краснодар крае белән кушарга омтылыш булган иде 2004 елда. Бу гамәл андагы халыкларда каршылык һәм ризасызлык тудырды. Россиядә «җирлекләр» оештыру турында да сүзләр чыгып куйгалый. Самара җирлеге, Татарстан җирлеге, Башкортстан җирлеге, Якутия җирлеге... Милли республикаларны башка төбәккә мәҗбүри кушарга ярамый, бу мәсьәләгә бик сак карау зарур.

Татарстан Республикасы Дәүләт Советының законлылык һәм хокук тәртибе комитеты рәисе урынбасары Рафил Нугуманов җәмәгать тәртибен саклауда ирекле халык дружиналарының зур әһәмияткә ия булуын әйтте. Полиция бөтен җиргә дә өлгерә алмый, диде ул.

Рөхсәтсез урыннарга куеп калдырылган машиналарны штраф мәйданчыгына алып китү мәсьәләсендә:
– Эвакуатор артыннан йөгереп, йөрәк өянәгеннән үлүчеләр саны артуы күзәтелә. Машина тәгәрмәченә «блокиратор» куюны кулланырга кирәк. Мәскәү белән килештереп, шушы турыда закон чыгару башлангычы бар, – диде Рафил Нугуманов.

Комитет 2014 елдан бирле 516 мәсьәлә караган. Казан, Чаллы, Кукмара һәм Лаеш муниципаль берәмлекләрендә күчмә утырышлар үткәрелгән.

Фото: realnoevremya.ru