#Язмалар 17 июнь 2022, 13:24

Федераль Сабан туенда 13 төбәктән җитмеш ат 5 млн өчен ярыша

17 июнь 2022, 13:24

17-18 июньдә Ульяновск шәһәрендә Федераль Сабан туе уза. Милли бәйрәмгә Россиянең 50дән артык төбәгеннән 500ләп кунак җыелды. Бәйрәмгә килүчеләрне Ульян чигендә үк милли киемнәр кигән милләттәшләребез татлы ризыклар, җыр-биюләр белән каршы алды. Бүгенге бәйрәм чаралары ат ярышыннан башланып китте. Оештыручылар сөйләвенчә, быел ярышларда катнашу өчен 13 төбәктән 70 ат сайлап алынган.

Скопировать ссылку

Федераль Сабан туенда 13 төбәктән җитмеш ат 5 млн өчен ярыша

Алар арасында Татарстан чабышкылары да бар. Ярышларның приз фонды - 5 млн.сум. Төп чабыш Ульян өлкәсе губернаторы призына булачак. Биредә шулай ук Казан шәһәре призына да узыш каралган.

Татар егете Фәнил Җәмдиханов Чувашия республикасын тәкъдим итә. Аның атына 6 яшь, исеме - "А зори здесь тихие РМ". Атның моңа кадәр ярышларда җиңгәне булган. Быел да хуҗасы чын күңелдән җиңүгә өметләнә. "Ярышларга чыкканда, хәтта суламыйм", - ди Фәнил.

Шуны да әйтергә кирәк, 22нче тапкыр оештырылучы Федераль Сабан туе Ульяновскта дүртенче тапкыр үткәрелә.

Ат чабышларын карарга легендар хоккейчы Владислав Третьяк та килде. Ул дистә елдан артык Сабан туйларына яратып йөрүен, төрле ярышларны кызыксынып күзәтүен ассызыклады. "Бу татар халкының уңганлыгын, булганлыгын күрсәтә торган бәйрәм. Спортны гына алыйк, Татарстан - илдә бу яктан иң алга киткән төбәкләрнең берсе. Сезнең Шәймиевны да, Миңнехановны да бик хөрмәт итәм. Татар халкының милли ризыкларын да яратып ашыйм», - диде Владислав Третьяк.

Автор фотолары

Кызыклы яңалыкларны күзәтеп бару өчен безнең МАХ каналына кушылыгыз.