Фитнеслар хәзер өйдә, абонементлар нигә?

Кечкенә генә, күзәнәге дә булмаган вирус тормышыбызны 180 градуска үзгәртте дә куйды. Бер мизгелгә дөнья тукталган кебек булды.

Ә кайбер оешмалар, хезмәт күрсәтү өлкәләре бер мизгелгә генә түгел, ә билгесез вакытка эшләреннән туктап торырга мәҗбүр. Мисал өчен, спорт заллары, фитнес үзәкләр, бассейннар кайчан элеккечә эшли башлавын әлегә күз алдына да китереп булмый. Ә аларга йөрү өчен акча түләнгән бит!

Россия сыйфат системасы  җитәкчесе урынбасары Андрей Белоусов сүзләренчә, карантин вакытында фитнес-үзәкләр абонемент карталарыннан файдалану вакытларын туктатып тора. Әгәр дә инде клиент бу мөмкинлектән файдаланырга теләмичә, акчасын кире кайтарырга уйлый икән, “Кулланучылар хокукларын яклау турындагы” канун нигезендә һәм Гражданлык кодексының 782нче матдәсе буенча алай эшләргә дә була.

Әлеге канун нигезендә, фитнес-клбука йөрүче теләсә кайсы вакытта килешүне таркатып, акчаны кире кайтарырга хокуклы. Гадәттә, бу процессны ничек башкарырга мөмкин булуы килешүдә язылган була. Мөрәҗәгатьтән соң, акчаны 10 көн эчендә клиентка кайтарырга тиешләр.

Әгәр дә клуб килешүне бозып, акчаны кире кайтарудан баш тарта икән,  ул чагында клуб җитәкчелегенә гариза язу таләп ителә. Ул гаризаларны кабул итүдән баш тарткан очракта, шаһитлар янында гаризаны кабул итмәү турында тагын бер гариза язарга һәм аны электрон почта аша юлларга киңәш ителә. Алай да булмаса инде судка мөрәҗәгать итәргә була.

“Шәһри Казан” хәбәрчесе шалтыратып белешкән берничә фитнес клуб хезмәткәрләре сүзләренчә, аларның клиентларының карталарының куллану вакыты әлегә озайтылган. Әгәр дә инде клиент акчасын кире кайтарырга тели икән, ул моны бары тик карантин тәмамланганнан соң гына эшли алачак. Чөнки клублар бикле, ә мондый хезмәт дистанцион башкарылмый икән.

Сүз уңаеннан, фитнес клубка һәм бассейнга йөри торган берничә хезмәттәшебезгә, әлеге учреждениеләр эшчәнлеген туктаткач ук, аларның карталарының куллану вакыты озынайтуны хәбәр итеп, смс хәбәрләр килгән. Димәк, фитнес үзәкләргә клиентларын югалтмау мөһим һәм алар турында җитәкчеләре кайгыртучанлык күрсәтә дип ышанасы килә.

Концерт билетларын нишләтәсе?
Билгеле инде, илнең мәдәни оешмалары да эшчәнлеген туктатарыга мәҗбүр булды. Йөзәрләгән концертлар, спектакшльләр һәм башка тамашалар кичектерелде. Әгәр дә мәдәни чара башка вакытка кичектерелә икән, алынган билетлар үз көчендә калачак, дип аңлата белгечләр. Әмма чараны оештыручылар бу хакта тамашачыларга хәбәр итәргә тиеш.

Фото: https://pixabay.com/