Фәрит Мөхәммәтшин: “Авырлыклар берләштерә”

Мондый авыр шартларда халкыбызның берләшүен ассызыклап, алгы сызыкта булганнарга гуманитар ярдәм җибәрелеп тора, мобилизацияләнүчеләрнең гаиләләре дә игътибарсыз калмый, диде. Махсус хәрби операциягә китүчеләр арасында депутатлар барлыгын да искә алды. 
Узган атнада Татарстан Дәүләт Советының утыз тугызынчы утырышында Татарстан Президенты атамасын “Рәис” дип үзгәртергә тәкъдим иткән иде. Әлеге уңайдан да Фәрит Мөхәммәтшин бердәм фикергә килә алуны билгеләп үтте.

–    Җәмәгатьчелек ил өчен шушы авыр чорда Конституцияне федераль законнарга туры китерергә кирәклекнең никадәр мөһим булуын аңлады, – диде ул.  
Очрашуда катнашкан журналистлар Фәрит Мөхәммәтшиннан Президентның яңа атамасына карата булган фикере белән дә кызыксынды. 

–    Анда тәкъдим ителгән атамалар бик күп булды. Рәис тә, башлык та, хан да. Дөрес фикергә килдек. Мондый заманда, бүгенге көндә бу мәсьәлә буенча тарткалашып, дошманнарны шатландырырга кирәкми. Тавышка куеп, парламентны бер фикергә китерә алдык. Минем уйлавымча, начар исем түгел. Рәис – гарәп илләрендә дә аңлашыла торган исем. Минем өчен кешесе яхшы булсын, эшчән, халкын ярата һәм булдыра торган, – диде ул. 
Киләсе ел Татарстанда, Президентыбыз Рөстәм Миңнеханов тәкъдиме белән, Милли мәдәниятләр һәм традицияләр елы дип игълан ителде. Фәрит Мөхәммәтшин аңа карата да үз фикерен җиткерде.

–    Президентның шундый инициатива белән чыгуына мин шат. Ул үзенә бер төрле ел булачак. Бүгеннән үк нинди чаралар узачагы турында сөйләшенә. Без үзебезнең рухи байлыгыбызны сакларга тиеш, бу – безнең миссия, – диде ул.