“Иң мөһиме – укучыларда укытучылык һөнәренә мәхәббәт уяту”

28 мартта Казан Федераль Университетының Филология һәм мәдәниятара багланышлар институты нигезендә психологик-педагогик сыйныфлар өчен “Учителем быть круто” җыелышы оештырылачак. Чарада укучылар һәм сыйныф җитәкчеләре катнашачак.

Быел Лобачевский исемендәге бөтенроссия фәнни-гамәли конференциясендә беренче тапкыр “Школа будущего” дип исемләнгән проект секциясе булачак. Әлеге секциядә электрон презентацияләр белән чыгыш ясау рөхсәт ителми, укучылар стендлар әзерләргә тиеш. Эксперт комияссиясеннән тыш, педагогик сыйныф укучылары да тәкъдим ителгән эшләргә бәя бирә ала. Конференциянең йомгаклау этабы 25 мартта узачак.

— Без 26 мәктәп белән килешү төзедек. Мәктәп укучылары “Введение в профессию” программасы буенча актив укый. Дәрескә шулай ук мәктәп директорлары, “Ел укытучы”лары чакырыла. Хикмәт шунда: белем бирүче кешеләр – ул безнең югары курс студентлары, магистрлар, аспирантлар. Һәр педагогик сыйныфның үз кураторы да бар. Монда имтиханны 100 баллга тапшырган, яки олимпиада җиңү яулаган беренче курс студентлары сайланды. Гадәттә, педагогик дәресләр шимбә үткәрелә, – диде КФУның филология һәм мәдәниятара багланышлар институтының Казан халыкара лингвистик үзәге мөдире Светлана Царева.

— Хәзерге көндә безнең өчен иң мөһиме – укучыларда, студентларда укытучылык һөнәренә мәхәббәт уяту, - диде Казан Федераль Университетының Филология һәм мәдәниятара багланышлар институты директоры Рәдиф Җамалетдинов. 

Апрельдә “Рус теле һәм әдәбияты Россиянең үзенчәлеген һәм халыкара интеграциясен формалашытыру чарасы буларак” дип исемләнгән бөтендөнья форумы  узачак. 

Шулай ук Россиянең язучылар һәм нәшриятчылар берлеге ассоциациясе тарафыннан яшь язучылар һәм шагыйрьләр өчен уздырылган конкурсның сайланган 60 катнашучысы Казанда белем алачак. Алар өчен әдәби Казан белән бәйләнгән квестлар, шигъри чара, түгәрәк өстәл уздырылачак. 

Адилә Илалова