Янабыз!!!
24 май киче. Сәгать кичке 11ләр тирәсе. Багдан тирән йокыда. “Әле ярый Соня ятмаган иде. Ул телефонын эзләде. Мин ятарга җыенып йөргәндә ут сүнде. Ут ялгагыч автоматны күтәрәм, кабынмый. Утсыз гына туалетка керергә булдым, ишеген ачып җибәрүем булды, өйгә терәлеп салынган мунчадан ут дөрли. Урамга чыгып йөгердем, янабыз, ярдәм итегез, дип кычкыра башладым. Мең рәхмәт күршеләремә, шул минутта 5-6 ир-егет кереп ялкынны сүндерергә тотынды, аннан 20гә җиттеләр, аннан бөтен тирә-яктан ирләр җыелды. Шул арада янгын сүндерүчеләр килеп җитте. Кызым Соня мин чыгып чабуга шалтыраткан булган, – дип сөйли Роза. – Күршеләремнең, янгын сүндерүчеләрнең тырышлыгы белән янгын колачлый алмады, мең рәхмәт аларга. Йортыбыз агач, җил булса, бик тиз камап аласы иде. Егетләр үзләрен аямыйча ярдәм иттеләр, янгынны тиз сүндерделәр”. Янгын сүндерүчеләр төн буе эшләгән. Түбәне сүтеп, очкын кабат пыскып китәргә мөмкинлек бирмәгәннәр. “Урамда кап-караңгы, берни күренми, егетләр шундый шартларда да эшләделәр, ташлап китмәделәр, бик тырыштылар. Барысына да чиксез рәхмәтемне җиткерәм”, – ди Роза.
Роза бар сынауларга да түзәргә тырыша. 30 апрель төнендә Соняның хәле авыраеп, ашыгыч ярдәм машинасы белән хастаханәгә алып киткән булалар. Төн буе кызы белән хастаханәдә булган Роза 1 май көнендә үзе пешә. Бакчадагы корткычларга кайнар су сибәргә уйлый. Янында улы Богдан. Ялгыш аягы таеп китә дә, улым пешә күрмәсен дип аны саклап үзе зыян күрә. Чыгарылыш кичәсенә дә кулын бәйләп килгән иде.
Инде менә янгын. Янгынның төп сәбәпчесе – май башында яңа гына куелган сэндвич торба. Самолет канаты кебек нык дип саткан булганнар. Бер айга да җитмәгән. Тишелеп, очкын төшкән. 24 май көнендә помидорлар утыртышырга иптәш кызы Лена килгән. Бакчада эшләгәннән соң мунча кергәннәр. Лена кан басымы белән интегә, Розаның кулы пешкән, мунчаны да кызу якмаганнар. “Кайгы ялгыз йөрми дигәннәре менә шушыдыр инде ул”, – ди Роза.
Ярдәм кирәк
Бу фаҗигане ишетеп, Розаның эш урыныннан ирләр килеп, яңгырлар башланып тагын да зур зыян килмәсен дип янган калайларны түбәгә япканнар.
Хәзер Розаның йорт-җирен яңадан тәртипләп чыгасы бар. Өйдә ир-ат булмагач, барысына да кеше чакырырга. Ә моның өчен тагын акча кирәк. Син ялгыз хатын, янгыннан соң, дип аңа бер оста да бушка эшләп китмәс. Өстәвенә төзелеш материаллары бик кыйммәт. “Котычкыч янгын теленнән күп өлешне саклап кала алдык, дөрес яңадан торгызырга туры киләчәк. Бу эшләрне башкарып чыгу минем өчен бик зур суммалар. Иң сөенгәнем, әле ярый үзебез исән калдык. Өчебезнең дә гайморит белән авырган вакытыбыз иде, ис тоймыйбыз. Төтен исен дә тоймаган булыр идек. Ничек тә төзеп була, кешене генә кире кайтарып булмый”, – ди Роза.
Дөрес, йортта яшәргә була. Энергетиклар утны ялгаганнар, газ әлегә юк. “Газсыз да яшәргә була, җәй көне, суыткыч тулы ризык. Мин һәрвакыт үзем пешерәм, әзер ризык сатып алганым юк”, – ди Роза. Янгын булган төнне аларны өйгә кертмәгәннәр. Сөрем газы белән агуланып үләчәксез, ярамый, дигәннәр. Розаны ике баласы белән иптәш кызы Лена үзенә алып киткән. Янган йортны ялгызы калдырмыйк дип, әнисе белән Равил абыйсы калган.
Фотода түбәсез генә калган кебек күренсә дә, янгын аямый ул, шактый зыянын салган. Моңа кадәр беркемнән ярдәм көтмичә ике баласын ялгызы үстерүче Розага бүген безнең ярдәм кирәк. Салкын кышлар башланганчы ике баласына мөмкинлекләр тудырасы бар. Исән калган әйберләргә дә сөрем карасы сеңгән. Богданны беренче класска әзерлисе, кызын дәвалыйсы бар. Бу җөмләләрне укучы һәркайсыбыз 100 сум гына булса да акча күчерсәк тә, тамчыдан күл җыелып, янгыннан калган хәрабәләрне торгызырга үз көчебезне кертергә ярдәм итәр идек. Роза өчен 100 сум да бик кадерле. “Якыннарымның ярдәмен тоя башлагач, күңелемдә өмет уты кабынды”, – ди Роза
Ярдәм итәргә теләүчеләр Роза Тожибоевна Перехрестюк исеменә беркетелгән 79534022910 телефон номеры аша Сбербанк, Совкомбанк, Тинькофф банкларына акча күчерә ала. “Помощь погорельцам” дип язарга онытмагыз.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар