«Ярый, үзебез исән-сау дибез, янгын төнлә чыккан булса, исән дә калмаган булыр идек...»

"Бөтен каралты-кураларны, мунчаны, өйне яңартып, төзекләндереп бетердек, рәхәтен күрергә язсын иде" дип сөенеп кенә йөргән көннәребездә гараждан ут чыгып, бернәрсәсез калдык", - диләр Мамадыш районының Югары Козгынчы авылында янгыннан зыян күрүче Гәрәевләр. 

Янгын чыгып, Гәрәевләрнең бөтен тапкан маллары берничә минут эчендә көлгә әйләнә. Ялларга дип Чаллыдан кунакка кызлары Ләйсән дә кайткан була. Бер кат чәйләр эчеп, табын артында хәл-әхвәлләр белешкәннән соң, иркенрәк бүлмәгә күчеп утырып чөкердәшеп утырганда шарт-шорт килгән тавыш ишетәләр. Бу көндезге сәгать өчләр тирәсе була. "Тәрәзәдән карасак, гаражыбыз яна. Безнең гараж, сарай, өй кушылып эшләнгән. Тиз генә йөгереп чыгып, сарайдан ике бозауны, этебезне чыгардык, гараж эчендәге әтинең машинасын коткарырга соң иде инде, капка төбендәге тракторны, минем машинаны читкә алып китеп куя алдык. Ул арада әни документларны җыйды, мин янгын сүндерүчеләрне чакырдым. Күршеләр тәрәзә аша телевизорны, кулга эләккән вак-төяк әйберләрне чыгара алганнар. Тавыкларыбыз сарайда калды, мәчебез дә өйдә калып янып үлгән", - дип сөйләде безгә Ләйсән.

Әлегә Гәрәевләр авылдагы бер буш йортка сыенган. Авылдашлары, райондашлары ярдәме белән көлгә әйләнгән нигезне чистарта да башлаганнар. "Узган җәйдә әти мунчаны сүтеп, яңаны эшләде, өйдә җылыту батареяларын алыштырды. Табын артында шуларны искә алып, әти, әкренләп бөтен җирне яңартып бетердек, шөкер, өйгә кондиционер гына аласы була, дип сөйләнеп утырган иде. Берничә минуттан бөтен малыбыз янып юкка да чыкты. Ярый, үзебез исән-сау дибез, янгын төнлә чыккан булса, исән дә калмаган булыр идек", - ди Ләйсән. 

Әтисе Хәлил абый да, әнисе Нурия апа икесе дә пенсиядә. "Әтием кулга бик оста, бер-ике елда йорт-җирне үз хәләл көче белән төзекләндереп, яңартып чыкты. Рәхәтен генә күрергә язмаган", - ди кызлары Ләйсән. 

Изге рамазан аенда Гәрәевләргә ярдәм итәргә теләүчеләр өчен телефон номеры: 
89093077011 - ВТБ, Сбербанк (Хайруллин Линар Ильнурович)