#Язмалар 23 апрель 2021, 15:53

Ике Габдулла эзләре буйлап самокатта...

23 апрель 2021, 15:53

Без һаман алга омтылабыз, ә тарих языла бара. Аны язган саен, туктап, кире борылып карарга, барларга кирәк. Тарих дигәч, күз алдына катлы-катлы музей биналары, тузанлы архив вә шәһәр урамында катып калган шәхесләребезнең сыннары килә. Ә бит яшьләрне кызыксындыру авыр, һәрдаим яңа идеяләр булдырырга кирәк. Аеруча милләт язмышы мәсьәләләренә җәлеп итү өчен креатив, җитез адымнар ясау мөһим.

Скопировать ссылку

Габдулла Тукайның 135 еллыгы уңаеннан Г.Кариев театры Тукай музее белән берлектә “Ике Габдулла?” дип аталган театраль сәяхәт уздырды.

Әлеге сәяхәт моңа кадәр беркайда да очрамаган, яңача форматта узды. Танылган мәдәният хезмәткәрләре, җырчылар, блогерлар, җәмәгать эшлеклеләре – барысы да бергә җыелып, Казанның Тукай белән бәйле урыннарыннан электросамокатта экскурсия ясады. Театраль сәяхәт дәвамында тамашачыларны ике Габдулла (Габдулла Тукай һәм Габдулла Кариев) образындагы Тинчурин театры артисты Артем Пискунов белән Кариев театры артисты Булат Гатауллин озатып барды. Программага кертелгән 5 “нокта”да экскурсовод татарның ике даһи Габдулласының хезмәтләре турында, милләт язмышы өчен җан атып йөргән вакытларын сөйләп, хәтердә яңартты. Г.Кариев театры ишек төбеннән башланып киткән сәяхәт Тукай музеенда тәмамланды.

- Тукай иҗаты күптәннән өйрәнелә, балаларга, яшьләргә тәкъдим ителә һәм шушы тәкъдим итү форматлары таныш кебек. Ләкин бүген без үзебез сынап караган яңа төр формат ярдәмендә Тукай иҗаты белән таныштыру аудиторияне җәлеп итә алырга тиеш. Чөнки монда спорт, сәяхәт, тарих, ниндидер маҗара да кергән. Миңа калса, бу проектны апрель аенда гына түгел, ә алга таба шәһәрнең экскурсион программасына да кертергә кирәк. Кызыксынучылар саны артачак, әлбәттә. Шәхсән үземә килгәндә, минем Шәрык клубын яңадан торгызасым килә. Ул бик кирәк. Милләтне таныту, җәлеп итү, Казанның данын үстерү, гомумән, киләчәгебезгә кагылышлы сорауларны күтәрү шул клубта булыр иде. Татарның активистлары бергә җыелса, әллә ниләр булдыра алабыз бит! – дип сөйләде журналист һәм продюссер Айваз Садыров.

Проектның сценарие махсус Тинчурин театры режиссеры Резедә Гарипова һәм Кариев театрының җитәкчесе, шагыйрә Луиза Янсуар тарафыннан төзелгән. Ә самокатлы сәяхәтне эчтәлек ягыннан тулылындыру Тукай музееның хезмәткәрләре ярдәмендә башкарылып чыкты.

Оештыручылар сүзе буенча, бу проект киңәйтелеп, аны авторлы тур итеп, теләгән һәркемгә тәкъдим итү мөмкинчелеге булдырылачак. Димәк, Тукай аенда-апрельдә генә түгел, ә җәй көннәрендә дә казанлылар, мәркәзебезнең кунаклары самокатта театраль сәяхәткә чыга алачак.

Алсу Мансурова

Фото: Лилия Кадыйрова аккаунтыннан

Кызыклы яңалыкларны күзәтеп бару өчен безнең МАХ каналына кушылыгыз.