Җиләк юк дигәнгә ышанмагыз!

Шулай да җиләк турында бераз сөйләргә була. Мин кечкенәдән үк җиләк җыярга яратам. Яратмый ни хәл итәсең, кечкенә чактан ук урманга өлкәннәр печәнгә бара, сине уятып җиләккә алып баралар. Җыйсаң да җыясың, җыймасаң да җыясың. Сер бирергә ярамый. Кыскасы, урманга баргач, чиләк тутырып җиләк җыю канга сеңгән. Быел яз һәм җәй башы салкынча килүгә карамастан, җиләк бихисап!

Кеше сүзенә карамый, урманга барырга һәм җиләк җыярга кирәк. Җиләк тапмаган очракта да, шәһәр ыгы-зыгысын читкә куеп, урман һавасын сулап, кошлар сайраганын, агачлар шаулаганын тыңлап кайту зыян итмәс.  Ә мин җиләк җыйдым.

Урман җиләген кышкылык өчен вак савытларга салып, туңгыргычта саклыйм. Кыш буе үземнең якыннарымны урман җиләге салынган компот, коктейль, ә иң яратканы – җиләк пирогы белән сыйлыйм. Җиләк пирогы да гади. Ачы камырдан вак пироглар ясап газ мичендә яки майга салып кыздырсаң да бик тәмле!

Камыр өчен кирәк:

– ким дигәндә 1 аш кашыгы коры кибет чүпрәсе (дрожжи),

– 1 чәй кашыгы шикәр,

– 1-2 аш кашыгы он,

– җылы су салып, кабарырга куябыз.

Чүпрә кабарган арада:

– 0,5-0,7 литр җылы сыеклык (я сөт, кефир, су катыш сөт, су, минераль су һ. б.),

– 1-2 йомырка,

– ярты чынаяк көнбагыш мае (сөткә басканда майны азрак алырга кирәк),

– 1 чәй кашыгы тоз салып, он кушып, камыр изәбез.

Пирогны мичкә 180 градуска, 40 минутка куябыз.

Чәйләрегез тәмле булсын!

Индира Сәйфуллина, Баулы-информ