Йорт хуҗасының туган көнендә янгын: Кукмарада туңдыргыч шартлаган

Кайчагында сәгать теле сыман төзек эшләгән көнкүреш техникасы һич уйламаганда сыната. Бу юлы да шулай килеп чыга: Кукмара районының Купка авылында яшәүче Раушания белән Наил Шәфигуллинар йортында тиктомалдан ялкын күтәрелә - терлекләрне карарга чыккан хуҗабикә өйгә әйләнеп кергәндә чолан ишеген ачып та җибәрә, туплар гөрселдәгәндәй, йорт-җир тетрәп тә куя... Шуннан коточкыч ялкын күтәрелә. 
- Әллә һава кергәнгә дә шартлаганмы, дибез. Туңдыргыч үзе дә шартлаган булырга мөмкин. Чоланда ике туңдыргыч тора иде, шуның берсе сафтан чыгып, шартлаган шул. Мин үзем сугымчы, иртүк мал суярга чыгып киттем. Раушания минән йоклап калды. Аны уятмадым да. Ул торып, чәйләр эчкәннән соң ат янына чыгып киткән. Терлекләрдән атыбыз гына бар да, тавыклар гына асрыйбыз. Ул эшне бетереп өйгә кергәндә шушы хәл килеп чыккан. Мескенкәем, күршеләргә чыгып йөгергән. Янгын сүндерүчеләр бәхеткә бик тиз килеп җиткәннәр, әгәр дә 10 минутка гына соңарсалар да ялкын күршеләргә үрли иде. Миңа шалтыраталар икән, ә минем телефон тотмый. Хәбәр килүгә кайтып очтым. Мин кайтканда дөрли-дөрли яна иде йортыбыз, - ди Наил Шәфигуллин. 

Язмышларының шаяруыдырмы, әллә күрәчәкләреме, Наил Шәфигуллинның туган көне була кичә. 52 яшен тутырасы иртә аңа әнә шундый хәсрәтле бүләк әзерләгән. 
- Иртәнге сәгать сигезенче яртыларда яна башлаганбыз. Бу йортны без моннан 5 ел элек бер миллион сумга сатып алган идек. Үземнең балаларым юк, Раушанияне өч баласы белән хатынлыкка алдым. Бергә яшәгән йортыбызны аның улына калдырып, үзебез башка чыккан идек, менә кабаттан шул нигезгә әйләнеп кайттык, - ди Наил. – Ул балалар һәммәсе дә үземнеке! Нишлисең, сынау бу, кичәрбез. Мин кайткач кына ялкынны сүндереп бетерделәр. Өйгә кереп документларны алып чыга алдым. Йортның түбәсе янды да, әлеге туңдыргычлар торган ягы юкка чыкты. Болай диварларны саклап калдылар. Анда күп нәрсә исән үзе, исән дип суга юешләнгәннәр дә, бик каты ис сеңгән. Ул киемнәрне 10 кат юып та исе бетмәслек. Ташларбызмы, җилләр исен алсынга эләгә элеп, ел буе урамда тотарбызмы, вакыт күрсәтер. Бәхеткә ат исән, тавыклар да үз көендә. Каралты курага ялкын сикерә алмады, рәхмәт, сакладылар, - ди Наил Шәфигуллин. 

Хәлләренең авыр чагы. Кыш уртасында урамда басып калдылар. Ярдәм итәргә теләүчеләр Шәфигуллиннарның туганы - Нәфисә Сәлимовнаның 89518973427 номеры беркетелгән Сбербанк картасына ярдәм юллый ала. Бер бөртек изгелек мең афәттән коткарыр дигән борынгылар.