Ирада Әюпова: "Театрларга тарихны белә торган көчле кадрлар кирәк"

“Бүгенге көндә милли театр үзенчәлекләренә бик аз игътибар бирелә. Студентлар уку йортыннан зур белем алып чыга, ләкин милли театрларның мәдәнияте һәм тарихы турында бернәрсә дә белмиләр. Театрларга тарихны белгән, аралаша һәм фикерли ала торган көчле кадрлар кирәк. Моның өчен төрле театрлар белән элемтәдә тору, аралашу, үзара тәҗрибә уртаклашу мөһим”, - ди ТР мәдәният министры Ирада Әюпова.

“Милли театр мәктәбе” Россиянең сигез төбәгендә узар дип көтелә. Беренчесе Махачкалада узган, хәзер Казанда, чиратта – Марий Эл, Коми, Башкортстан һәм башка республикалар. Киләчәктә халыкара дәрәҗәсенә чыгу планнары да бар икән. Проектта 18-35 яшьтәге кешеләр катнаша ала. “Бу – театрда эшләүчеләр генә түгел, мәдәният һәм сәнгать өлкәсендә эшләүче хезмәткәрләр. Китапханә, циркта эшләүчеләр дә проектта катнашырга теләк белдерде. Гомумән алганда, бу проект ике юнәлештә тормышка ашырыла. Аның беренчесе – һөнәри юнәлеш июнь ахырында Якутскида узды, монысы исә белем бирүгә багышланган өлеше”, - ди Александрия театры директоры урынбасары Алиса Науменко.

Проект 3 көн дәвам итәчәк. Казаннан 35 кеше катнашыр дип көтелә. Программа кысаларында менеджмент нигезләре, проект белән идарә итү, фандрайзинг, театр проектларын проектлаштыру һәм үстерү, проект өстендә команда белән эшләү каралган. Проектта катнашучыларга дәүләт үрнәгендәге махсус таныклыклар тапшырылачак. Аларны илнең менеджмент һәм театр өлкәсендәге алдынгы белгечләр укытыр дип көтелә.

“Әлеге проектта Камал театрыннан 4 кеше катнашачак. Бу – PR белгече, маркетинг хезмәткәрләре һәм баш администратор. Тинчурин, Әлмәт, Буа һәм башка театрлардан да шундый ук вазыйфадагы кешеләр барачак. Артистлар анда булмаячак. Артист роль уйный, режиссер әсәрне сәхнәгә куя. Шуны халыкка дөрес итеп ничек тәкъдим итәргә һәм сатарга? Без әнә шул өлкәдә белем алырга телибез. Шуңа күрә, минемчә, мондый интенсив проектлар безгә бик кирәк. Белем беркайчан да артык була алмый. Иң уңайлысы шул – Мәскәүгә яки Питерга барырга кирәкми, укулар Казанда узачак”, - ди Г.Камал театры директоры Илфир Якупов.

Әлеге проект Татарстан Республикасы Хөкүмәте ярдәме белән оештырыла.