Ишле гаиләләргә нинди ярдәм чаралары каралган?

Ишле гаиләләргә күп кенә ярдәм чаралары да каралган. Ташламалар өлкән балага 18 яшь, яки уку йортында белем алса, 23 яшь тулганчы бирелә. Федераль ярдәм чаралары турында сезгә дә сөйлибез.

Ял
Әгәр дә гаиләдә 18 яшькәчә өч һәм аннан күбрәк бала булып, кечесенә 14 яшь тулмаган икән, ата-ана отпускны теләсә кайсы уңайлы вакытта алырга мөмкин. Эштә расланган графикны үтәү мәҗбүри түгел.

Җиргә салым чигереше
Әгәр дә җир кишәрлеге зурлыгы 6 сутыйдан артмый икән, аның өчен салым түләргә туры килмәячәк. Әгәр дә ул зуррак икән, салымны шуннан артык өлешенә  исәпләячәкләр. Ташлама автомат рәвештә ясала. Әгәр дә моны эшләмәгәннәр икән, Федераль салым хезмәте зайтында гариза бирергә һәм балаларның туу турындагы таныклыгын беркетергә кирәк.  

Милеккә салымны өстәмә чигерү
Ел саен күпбалалы ата-аналар 18 яшькә кадәрге һәр балага фатир өчен 5 квадрат метр, торак йорт өчен 7 квадрат метр бәясе күләмендә салым чигерүеннән куллана ала. Ташлама автомат рәвештә бирелә. Әгәр дә моны исәпкә алмаганнар икән, Федераль салым хезмәте сайтында, күпбалалы гаилә статусын дәлилләгән документларны, балалар туу таныклыкларын беркетеп, гариза языгыз.

Ипотеканы тулысынча яки өлешчә каплауга 450 мең сум
Төп шарты өченче яки аннан соңгы бала 2019 елның 1 гыйнварыннан соң туарга тиеш. Түләүне алу өчен Дәүләт хезмәтләре порталы аша яки ипотеканы рәсмиләштергән банк бүлекчәсендә шәхсән гариза бирегез.

Ай саен тиешле стандартлы налог чигерүе
Эш бухгалтериясендә яки салым хезмәте бүлекчәсендә гариза язып, хезмәт хакыннан тотып калына торган салымны киметергә мөмкин. Әйтик беренче һәм икенче бала өчен 1,4 мең (һәркайсына) сумнан салым тотылмаячак. Өченче һәм аннан соңгы балалар өчен 3әр мең сумыннан салым алынмый.

Күпбалалы әни өчен пенсиягә вакытыннан алда чыгу мөмкинлеге
Өч баласы булганнар пенсиягә 57 яшьтә, дүрт бала әниләре 56 яшьтә, биш һәм аннан артык бала табучылар 50 яшьтә пенсиягә чыга ала. 

Вакытыннан алда пенсиягә чыгу өчен, әни кешегә 15 елдан да кимрәк булмаган стаж тупларга кирәк. Пенсия билгеләү өчен Социаль фондка, МФЦга мөрәҗәгать итәргә яки Дәүләт хезмәтләре порталы аша гариза бирергә кирәк.