#Язмалар 17 февраль 2019, 11:33

«Калеб» импровизациягә өйрәтә

17 февраль 2019, 11:33

«Калеб» яңа буын җыены, Кариев театры белән берлектә, импровизация – иркенлек дәресләре үткәрә башлый. Бу хакта «Театрда импровизация» актерлык лабораториясенә багышланган матбугат конференциясендә әйттеләр.

Скопировать ссылку

24 февральдә теләге булган кешеләр өчен тренинглар оештырыла. Осталык дәресләрендә актер булмаган кешеләр дә катнаша ала. Дәресләрне Туфан Имаметдинов, Марсель Нуриев һәм Нурбәк Батулла алып барачак.

– Тренингларда күнегүләр ясап карыйбыз да, кеше күп килсә, 25 февральдә кастинг үткәрәбез, – ди Нурбәк.

Командага 16 кеше сайлап алыначак һәм алар 15 мартка кадәр импровизациягә өйрәнәчәк. 15 мартта лабораториядә катнашучыларның беренче эшләре тамашачыга тәкъдим ителәчәк.

Сайлап алынган кешеләрне актер һәм режиссер Илдар Мусин белән актер һәм педагог Андрей Феськов та «шомартачак» әле. Болар – дөньякүләм танылган импровизация осталары.

– Илдар Мусин «Демидов этюдлары» дип аталган бик уникаль методика буенча эшли. Демидов методикасын белүчеләр аз. Ул көнчыгыш фәлсәфәсенә, иркенлеккә корылган. Демидов – гаделсез онытылган исем. Ул Станиславскийның чордашы, алар бергә эшләгәннәр, – дип сөйләде Кариев театрының хореографы, «Алтын битлек» премиясе лауреаты Нурбәк Батулла.

Илдар Мусин – Татарстан егете. Ул Санкт-Петербургта укыган. Хәзерге вакытта Бурятиянең буддизм университетында фәлсәфә өйрәнә. Казанга ул Нурбәк Батулла чакыруы буенча килгән.

– Әлеге тренинглар кешенең эчке потенциалын ача. Бу – сирәк очрый торган педагогика. Педагог синең кимчелекләреңне түгел, уңай якларыңны күрә. Җәмгыять безгә чикләр куя, шуңа без эчке потенциалыбызны ача алмыйбыз, – дип аңлата Нурбәк Батулла.

Әлеге тренинглар «Калеб» яңа буын җыены һәм Кариев театры кысаларында оештырылган «Театрда импровизация» актерлык лабораториясенә әзерлек булып тора.

Кызыклы яңалыкларны күзәтеп бару өчен безнең МАХ каналына кушылыгыз.

#кариев театры #«Театрда импровизация» актерлык лабораториясе #«Калеб» яңа буын җыены