Картаймадык, акыллыландык кына!

Саф һава - тәнгә дәва дигәндәй, бүген иртәнге 7.30 сәгатьтә өлкәннәрнең буыннарын яздырырга дип әби-бабайларны “Дәрвишләр” скверында узачак дәвалау физкультурасына чакыралар. Йокыдан соңрак торырга яратучыларны   10.00 сәгатьтә Горки-Әмәт урманында Скандинавия йөрүенә көтеп калалар. Әлеге чараларда катнашу бушлай.

15.00 сәгатьтә “Дом” эко-үзәгендә “Арт Академия” иҗат студиясе рәсем ясау буенча мастер-класс оештыра. Чарага +7(965)587-79-97 телефоны буенча теркәлергә мөмкин. 16.00 сәгатьтә Казан стилист-имиджмейкеры Кристина Беляева заманча таләпләргә туры килү өчен әйберләрне бер-берсенә ничек туры китерү турында сөйләячәк. 17.00 сәгатьтә неврология һәм гомуми практика кафедрасы табиб-ординаторы Ләйсән Хөснетдинова “Баш мие: аек акылны ничек сакларга” темасына лекция белән чыгыш ясый.

Моннан кала, 2-8 октябрьдә “Мир” кинотеатрында өлкәннәр өчен бушлай кино күрсәтеләчәк. Өлкәннәргә “Невероятные приключения итальянцев в России”, “Зимний вечер в Гаграх”, “Тутык кыңгырау” (“Эхо школьного звонка”), “Девчата”, “Бибинур” фильнарын күрсәтәчәкләр.
Өлкәннәр өчен мәдәни чаралар моның белән генә тәмамланмый әле. Ун көн дәвамында Татарстанның тугыз музеенда әби-бабайлар өчен бушлай күргәзмәләр була әле. Әйтик, Татарстан Республикасы Милли Музее көндәлек күргәзмәләреннән тыш сурдотәрҗемә белән «Адмирал» фильмын күрсәтәчәк, “Казанда Романовлар” лекциясен сөйләячәкләр.

Шулай ук өлкәннәр декадасы кысаларында 1 октябрь көнне Казан мунчалары әби-бабайларга бушлай хезмәт күрсәткән.