“Картина герое булырмын дип уйламадым да”

Чаллы рәссамчысы Татьяна Низамова ясаган портрет ул.

–    Урып җыю вакытында кырда төшке ашны ашаганнан соң комбайныма менеп утырам дигәндә генә, бер рәссам килеп, тәгәрмәчкә сөялеп утырыгыз әле, фотога төшерәм, диде. Кемнәр кемнәр, рәссамнарның әле безгә килгәне юк иде. Картина герое булырмын да, портретым Мәскәүдә эленеп торыр дип бөтенләй уйламадым. Аның турында оныткан да идем, – ди ул, көлеп.

Шамил абый тумышы белән Иске Барыш авылыннан. Мәктәптә укыганда ук комбайнер ярдәмчесе булган. Автотранспорт техникумында укыганда да каникулларда кырда эшләгән. Армиядә хезмәт итеп кайтканнан соң, туган колхозында эшкә кала. Мастерской мөдире булып та эшләргә туры килгән. Озак еллар инде "Август-Кама Тамагы" авыл хуҗалыгы предприятиесендә тракторчы-машинист булып эшли. 

– Авыл кешесе эштән курыкмый ул. Җирне, җирдә эшләүне ярата. Көннәр озая башлады, язгы көтәбез, – ди ул. 

Тиздән Шамил абый 61 яшен тутыра. Үзен яраткан эшендә, яраткан комбайны янында сурәтләнгән картинаны да туган көненә бүләк дип кабул иткән. 
Әлеге картина "Хезмәт сәнгате" күргәзмәсендә урын алган. "Вакыт, алга!" фестивале кысаларында рәссамнар җәй көне кырга чыгып, авыл уңганнары белән танышып кайткан булган. Бу “Август” компаниясенең шундый беренче тәҗрибәсе. 

Татьяна Низамовадан кала, Яңа Третьяковкага «Август» предприятиесе мәйданчыкларында эшләгән тагын өч рәссамның эшләре куелган: алар – Наталья Смирнова, Алексей Волков һәм Катерина Фехер картиналары.

Күргәзмә ачылышында “Вакыт, алга!” фестивале идеологы, билгеле сәнәгатьче Константин Бабкин билгеләп узганча, кешеләрне иҗади хезмәткә һаман саен күбрәк җәлеп итү ил файдасына гына эшли. “Яшьләр предприятиеләрнең эш процессларына башкача карый башлый. Предприятие җитәкчеләренә мөрәҗәгать итәсем килә: рәссамнарны чакырып, заказлар бирегез. Аларга булышлык күрсәтегез, чөнки болар барысы да безнең тормышыбызны бай, бай һәм матур итә" дигән ул күргәзмә ачылышында.