Казан ярминкәсендә мохтаҗларга ярдәм күрсәтелә (фотолар)

“Казан” агросәнәгать паркы җитәкчелеге декабрь аенда хәйрия акциясе дә игълан иткән. Фермерлар декабрьдә сәүдә урыны өчен символик рәвештә 1 сум гына түли. Ветеринария тикшерүе дә бушлай. Икенче хәйрия чарасы: мохтаҗ гаиләләр өчен продукция сатып алып, махсус суыткычка куеп калдырырга була.

Узган шимбәдә “Казан” агросәнәгать паркы нәкъ Сабантуйны хәтерләтте: сый-нигъмәт тулы сәүдә рәтләре, җыр-бию... Татарстан Президенты Рөстәм Миңнеханов килеп төшкәч, гармун моңнары тагын да көчәйде, агропарк төрле милләт ансамбельләренең ана телләрендә башкарган җырларга күмелде.

Президент Рөстәм Миңнехановка Саба районы башлыгы Рәис Миңнеханов, Арча районы башлыгы Илшат Нуриев, Аксубай районы башлыгы Камил Гыйльманов, Нурлат районы башлыгы Алмаз Әхмәтшин үзләренең төбәкләрендәге агропредприятиеләр, фермерлар һәм шәхси хуҗалыклар җитештергән продукциядән оештырылган сәүдә рәтләрен күрсәтте.

- Казанда һәм үзебездә ике атнага бер авыл хуҗалыкы ярминкәсе үткәрбез. Башкалада монысында да 27 сәүдә чатыры белән катнашабыз, - диде Нурлат районы башлыгы Алмаз Әхмәтшин.

Казан мэры Илсур Метшин ярминкәләргә килеп, казанлыларга сыйфатлы җирле продукция сатканнары өчен район башлыкларының һәрберсенә рәхмәт әйтеп узды.

Республиканың Авыл хуҗалыгы һәм азык-төлек минисстры Марат Җәббаров әйткәнчә, ярминкәләрдә Татарстанда Авыл хуҗалыгы министрлыгы грантлары ярдәмендә үз фермерлык хуҗалыкларын оештырган кешеләр күп.

- Фермерлар казлар да үстерә, терлек тә асрыйлар. Ярминкәләргә ит, сөт һәм яшелчәне муллдан алып киләләр, - диде министр Марат Җаббаров.
Татарстан Президенты Рөстәм Миңнеханов авыл хезмәтчәннәренә уңышлар теләп, “Казан” агросәнәгать паркы бинасы эченә узды. Анда Президентны инвалид арбасындагы ир-ат туктатты.

- Яңа инвалид арбасына акчам җитми, ярдәм итегезче! - диде ул. Соңыннан Антон Кайнов исемле икәнлеге мәгълүм булды.
Президент Рөстәм Миңнеханов: “Борчылма, булышырбыз”, - дип җавап бирде.

Казан Кремленең рәсми вәкиле Лилия Галимова сүзләренә караганда, Татарстан Президенты Рөстәм Миңнеханов та сөт һәм башка ашамлыклар сатып алып, әлеге суыткычка куйган.

“Казан” агросәнәгать паркында сәүдә башлап җибәргән үзмәшгульләр дә Президентка үз гозерләрен җиткерергә ашыкты. Үзмәшгульләр үзләренең товарларын банк картасы ярдәмендә дә сатып җибәрү мөмкинлеге тудыруны сорады. Татарстан Президенты бу мәсьәләне чишүне мәгълүм банкка йөкләргә ышандырды.