Казанга акча бүлгәндә, бистәләр мөлдерәп карый

“Эшлекле дүшәмбе” киңәшмәсендә шәһәр Башкарма комитеты җитәкчесе урынбасары – тышкы төзекләндерү комитеты рәисе Игорь Куляжев хәбәр иткәнчә, бу эшләрне башкару өчен федераль һәм республика бюджетларыннан 11,7 миллиард сум тәгаенләнгән. Әлеге чыганакларның 2,9 миллиард сумы урам-юл челтәрен ремонтлауга, ә 6,5 миллиард сумы юллар проектлауга, төзүгә һәм үзгәртеп төзүгә тотыла. Татарстан Президенты Рөстәм Миңнеханов башлангычындагы “Безнең ишегалды” республика программасы буенча быел башкалада 2,3 миллиард сумлык төзекләндерү үткәреләчәк.
– “Имин һәм сыйфатлы автомобиль юллары” федераль проектының да ярдәме зур. Быел әлеге чыганактан юлларга 640 миллион сумлык төзекләндерү башкарыла, – диде Игорь Куляжев.

Мисал өчен, Гареев, Хезмәт, Белинский, Беломорская, Гагарин, Гладилов, Голубятников, Лесная, Совет районындагы Магистраль, Маршал Чуйков урамнары юллары һәм Старательная тыкрыгы юлы шушы проект хисабыннан ремонтлана.

Шәһәр кварталлары эчендәге юлларны төзекләндерү исемлеген төзегәндә “Халык контроле” электрон системасына, шулай ук “Халык фронты” иҗтимагый хәрәкәтенең “Карта убитых дорог” интерактив проектында тәнкыйтьләнгән урамнар исәпкә алынган. Әлеге исемлектә: Азин, Кол Гали, Себер тракты, 3нче Кленовая урамнары юллары, шулай ук Япеев һәм Бертуган Батталов урамнарына тоташкан юллар бар. Моннан тыш, ишегалларына һәм социаль учреждениеләргә тоташкан 78 юл өлеше ремонтлана.
 Әмәт, Иске Горки, Вознесенск, Константиновка, Северный, Борисоглебск, Урман аръягы, Аракчино, Плодопитомник, Борисково һәм башка бистәләрдәге 22 урам юлы яңартыла.
“Акинское”, “Домостроитель”, “Строитель №1”, “Совет”, “Залив” бакчачылык ширкәтләренә (аларда 700дән артык кишәрлек исәпләнә) илтә торган юллар төзекләндерелә.