Хуш, остаз: күперләр мәңгегә янды (Ранис Газизов вафаты илә)

Тып-тып-тып... Йокыдан юыну бүлмәсендә түшәмнән су тамчылаган тавыш уятты. Югары кат күршеләрдә “бәйрәм” димәк. Вакытның төнгә авышып килгән мәле икән. Ирексездән кулга телефон алынды. Ә анда җан өшеткеч хәбәр: Ранис абый китеп барган... Су кайгысы онытылды.

...Без – “Юлдаш” газетасын укып-үскән буын. Заманның беренче шәхси газетасы булганга гына түгел, татар матбугатына алып кергән яңалыгы белән дә күңелне әсир иткәндер ул. Аны гамәлгә куйган Ранис әфәнде белән студент елларында танышырга туры килде – булачак журналистларга осталык дәресе биргән, тәҗрибәсе белән уртаклашкан иде. Шат елмаюы, чамасын белеп кенә кете-кете көлүе истә калган.

Язмыш безне 2008 елда кулга диплом алып, районда эшли башлаганга биш ел вакыт узгач кабат күрештерде. Инде хезмәттәшләр буларак очраштык. Авылны ташлап, шәһәргә күченгән яшь гаиләне эшле иткән иде ул. Үземне – корреспондент, тормыш иптәшем - компьютерда җыючы. Һәм беләсезме, эшле генә итмәде, остазыма да әйләнде Ранис әфәнде. Көн дә елмаеп килеп керә, һаман да элеккечә кете-кете көлә, хәл-әхвәл белешә, бала-чаганың хәлен белешә... Уйлап утырам да, нәтиҗә ясыйм: иҗатымның иң ялкынлы чагы “Юлдаш” редакциясендә эшләгән шул биш елга якын вакытка туры килгән икән бит. Ранис абый мәктәбе аша узып, зирәк журналистка әйләнелгән, Татарстанның бөтен районнары урап кайтылган, күпме кешеләр белән танышылган, “усал язмалар” (Ранис абыйның яраткан сүзе!) язылган... Иң мөһиме – шул эшләр җитәкчелек тарафыннан тиешле бәясен алган.

...2009 ел. Казанда бүлмә сатып алырга уйлап йөргән чагыбыз. Кризисны сылтау итеп бер генә банк та кредит бирергә ашыкмый. Шулай да берсе табылды. Анысы да җитәрлек бирми. Тиенләп җыя торгач тагын 80 мең сум акча җитмәгәнлеге ачыклана. Кыюсыз гына Ранис абыйның ишеген кагам, тагын да кыюсыз рәвештә хәлне аңлатам, 30 мең сум акча сорыйм. “Калган 50сен каян алмакчы буласың”, – диде дә, җитмәгән кадәр сумманы чыгырып бирде. “Җайлап кына түләрсең әле!..” Шөкер, түләнелде!

2012 елда “Юлдаш”тан китәргә туры килде. Үзем теләп. Холкым шундый: бер урында артык төпләнеп утыра торганнардан түгелмен. Мүкләнүдән куркам. Ранис абый моны авыр кабул итте. Үз хезмәткәрләренең башка матбугатка киткәнен ошатып бетерми иде ул. Шул рәвешле ике арада күперләр янды. 
Күрешмәгәнгә сигез ел вакыт узган да киткән. Ләкин гел очратасым килеп яшәдем. Үпкәләр онытылгандыр, елмаеп каршы алыр, кете-кете көлер кебек иде. Очрашмадык... Инде дөньялыкта күперләр мәңгегә янды. 

...Төнем йокысыз булды. Юыну бүлмәсе түшәмендә төнге су тамчыларының эзе дә калмаган. Ранис абыйны гына кайтарып булмый. Хуш, остазым. Рәнҗеп китмә. Урының оҗмахта булса иде!..

Татар матбугатына яңа сулыш өргән журналист Ранис Газизовны соңгы юлга озаттык. Ул Казанның "Курган" зиратында җирләнде...