"Китап” радиосы кайчан ачылачагы билгеле булды

-Радио җәйгә, июнь айларында эшли башлар дип торабыз. Әле ачылып эшли башларга хокук бирә торган лицензиябез кулыбызда юк, - диде “Татмедиа” АҖнең Телевидение һәм радиотапшырулар департаменты җитәкчесе урынбасары Алмаз Миргаязов.

Радионың штаты инде туплана башлаган һәм алар тапшыруларны әзерләргә дә керешкән. Радионың баш мөхәррир вазыйфасын Алмаз Миргаязов башкарачагы да билгеле.

“Татмедиа” канаты астында ачылачак радио әлеге хокук өчен икенче тапкыр ярышты һәм “Большое Радио”, "Ореноблмедиа"дан өстен чыкты.
– Радио форматы Татарстанның танылган артистлары тарафыннан көйгә салынган әдәби әсәрләрнең аудиоязмаларын трансляцияләүне күздә тота. Радио­канал эшчәнлеге Татарстан халкының социаль, мәдәни һәм рухи-агарту сорауларына җавап бирәчәк, – диде Татарстан Дәүләт Советының мәгариф, мәдәният, фән һәм милли мәсьәләләр комитеты рәисе Айрат Зарипов.

Әлеге дулкында классик җырлар, радиоспектакльләр, классик проза һәм поэзия әсәрләрен тыңларга мөмкин булачак.

Лилия ЛОКМАНОВА