Казанда сигезенче тапкыр “Мин күкне сайлыйм” тамашасы үткәрелде

Әмма “Мин күкне сайлыйм” тамашасын оештыручылар, аеруча чыгыш ясаучылар шимбә көнне “Казан” гаилә үзәгенә килүчеләрне “Ах!” иттерә алды.
Гаҗәпләндергән беренче әйбер – ул тамаша карарга килгән кешеләрнең күп булуы. “Яшьләр үзәге” автобус тукталышыннан алып, “Кырлай” аттракционнар паркы, Ленин дамбасы һәм “Казан” гаилә үзәге тирәсе кырмыска оясын хәтерләтә иде. Сабан туйлары, төрле концерт-тамашалар, спорт ярышларына күнегеп беткән казанлылар массакүләм чараларга шул кадәр сусаган ки, бакчасын да, авылын да онытып, бирегә килгән диярсең. Социаль аралык, битлек, перчаткаларны да оныткан халык. Барысының игътибары – күктә!

Хәер, бәйрәм уза торган төп мәйданга кергәндә барлык кешеләрнең дә тән температураларын үлчәп, битлекләр һәм антисептиклар тараттылар. Безгә хәтта алты шундый җыелма эләкте. Ирем белән икебезгә берәр җыелма алганнан соң, волонтер кыз: “Тагын кирәкмиме? Бигрәк авыр, тизрәк таратып бетерәсе иде моны”, – дигәч, тагын дүртне алдык. “Битлекләрегезне киюегезне үтенәбез!” – дип тә микрофоннан әйтеп тордылар. Әмма аңа карап кына эсседә авыз-борынын капларга ашыгучылар күренмәде.

...Төп мәйданда бер урында сәхнә, ә икенче якта исә үзмәшгульләр ярминкәсе, тамак ялгау өчен сәүдә нокталары урнаштырылган. Гомердә дә кофе, сок эчмәгән, пицца ашамаган төсле халык су буе чиратта торды.

Чират тагын самолет эченә балаларны утыртып фотога төшә торган урында да шактый иде. Гомумән алганда, биредә берничә фотозона оештырылган. Барысы да – бушка. Шулай булгач, халык рәхәтләнде сурәт ясап.

Күктәге тамашага килгәндә, тел-теш тидерерлек түгел. Бәйрәмдә 30 самолет һәм вертолет чыгыш ясады. Алты МиГ-29 очкычыннан формалашкан данлыклы “Стрижи” төркеме чыгышы иң таң калдырганы булгандыр, мөгаен. Казансу елгасы өстендә ясаган очышларны балалар гына түгел, өлкәннәр дә сокланып, пилотларның һәр гамәлләренә кул чабып карады. Алар бер-берсенә шундый якын очалар, өстәвенә төрле трюклар ясыйлар. Бер мәлгә йөрәк алар өчен куркудан туктап ала төсле. Ә барысы да тәмамланганнан соң, “уф” дип куясың. Бу чыгышларны күргәннән соң шактый малай очучы булырга хыяллангандыр, мөгаен.
Сигезенче тапкыр үткәрелгән тамаша ТАССР оешуга – 100 һәм Казан вертолет заводы оешуга 80 елга багышланган иде. Шул уңайдан, Татарстан Премьер-министры Алексей Песошин дәүләт бүләкләре дә тапшырды һәм “Мин күкне сайлыйм” тамашасы матур традициягә әверелүен искәртте.
Традицияләр әйбәт инде ул. Әмма сәламәтлекне дә онытмасак иде!

Лилия ЛОКМАНОВА.