«Сарыкны өч мең сумга алып, сигез меңгә сатучылар да бар»

Дагыстан, Ингушетия, Калмыкия, Кабардин-Балкар, Адыгей республикаларында, Волгоград, Амур өлкәләрендә бу чирләрнең икесе дә күзәтелә. Күрше Башкортстанда да сарыклар арасында бруцеллез авыруы табылган. Анысы бөтенләй дәвалап булмый торган авыру санала. 

– Атап үтелгән йогышлы авырулар илнең 32 субъектында теркәлде. Аларны республикага кертмәү максатыннан корбанлык сарыкларын  авырулардан имин булмаган төбәкләрдән алып кайту тыела. Бу чирләр кешеләрнең үзләре өчен дә куркыныч тудыра, – дип сөйләде ул матбугат очрашуында.  

Спикер билгеләп узанча, республикада бүген 300 мең сарык исәпләнә. Корбан чалырга теләгән һәр кешегә ул җитәрлек. 

– Шул рәвешле йогышлы чирләрдән дә сакланачакбыз, үзебезнең җирле җитештерүчеләргә дә булышлык күрсәтәчәкбез. Күп еллык тәҗрибәдән күренгәнчә, бездә үрчетелгән сарыклар кайтарылганнардан бер җире белән дә ким түгел. Элек исә читтән корбанлыкка карата булган таләпләргә туры килмәгәннәре дә кертелә иде. Корбанлык алганда сатулашу тыела дигән сүздән файдаланып, күпкә яшьрәк һәм кечкенәрәк сарыкларны алып килүче намуссыз алыпсатарлар да булды. Сарыкны өч мең сумга алып, монда сигез меңгә сатарга тырышалар алар, – диде Габделхак Мотыйгуллин.