Кушаматлар да онытыла, ә сездә сакланамы?

Ул кушаматлар каян алынып, нинди вакыйгаларга нигезләнгән? Беркем белми. Авылда бетеп барган күпме нәсел белән бергә кушаматлар да онытылып бара инде.

Чәүкә Мәликәсе бар иде, Нәзир Габделхаковлар нигезендә яшәгән әби. Мәликәттә үлгән, кызлар читкә китеп беткән, бүген инде алар да исән түгел, кушамат та онытылган. Чыпчык Гәффәсе. Ул да юк, балалар таралган. Аның нигезендә Ринат Мөхлисуллин яши хәзер. Күгәрченнекеләр. Аларның нигезе Фаиз Мотыйгуллиннар каршысында, зур нәсел булган, кемдер сугыштан кайтмаган, кемдер читкә киткән.

Вәҗем Абдулласы булган әле. Бик төгәл, вакчыл кеше булганга Вәҗем дигәннәр. Алар Поляныга күчеп киткәч, нигезләренә Газиз абый белән Маһинур апа башка чыгып йорт җиткерде. Бүген ул нигез дә бушап калды инде. Корт чаккан Гайшә. Күз кабаклары шешмәкләнеп торганга шулай дигәннәрдер инде. Гайшәттә дә юк инде күптән. Әкмән Хәкимҗаны. Күрше авылдан килгән киленне, тиз генә Әкмәнне чакырып кил, диеп җибәргәннәр. Йомыш кушучылар ул киленнең башка авылныкы икәнен уйлап тормаган. Ә Фагыйлә апа, кызу гына ишек шакып, Әкмән абзый, сине кәнсәләргә чакыралар, дигән. Аннан булган инде хәлләр... Ни дисәң дә, бригадир бит әле Хәкимҗан абзаң. Шулай шул инде, районда иң зур, 360 хуҗалыклы, унар адашлы авылда кешене каян белеп бетерәсең? Кушаматы да булмаса...

Рәйсә Галимуллина, Кукмара, Мәмәшир