Кышка кереп барганда өстендәге бер кат кием белән урамда калган... 

Югары Көек авылы – районда кечкенә генә, кешеләренең күпчелеге дә олы яшьтәгеләр. 

– Иртәнге 8ләр тирәсендә аш-су бүлмәсендә электр чыбыгның кыска ялганышы аркасында янгын чыккан. Әниебез иртән радио тыңларга ярата, "радионы кабызган идем, шартлаган тавыш ишеттем, ут сүнде", диде. Шуннан очкын чыгып, бөтен өйне камап алган. Олы яшьтәге кеше нишли алсын инде мондый вакытта. Югалып та калган, ярдәм сорап, өстенә кимичә, урамга чыгып йөгергән. Күршеләренә таба барганда, дулкынланудан егылып калган, җитмәсә, йөрәге дә авыртып тора. Әле ярый икенче күрше апа аны күреп башка күршесенә керткән. Янгын сүндерү машиналары килгән... Әле 40 минутлап вакыт узгандыр. Безне шәһәрдән чакырттылар. "Казанга киләсе килми, яшәгән нигеземнән аермагыз", дип елый. Күпме көч куеп төзелгән йорты бит инде ул! Югары Көек авылы халкына ихлас рәхмәтләремне белдерәм. Шулкадәр бердәм булдылар, шулкадәр ярдәм иттеләр – искиткеч! Күпмегә көчебез җитә, кечкенә генә өй салып чыгарга ниятлибез. Хәзерге вакытта әниебез күршедәге хуҗасыз йортта яшәп тора,- дип сөйләде безгә Рәмзия апа. 

Чыннан да, бурдан әле нәрсәдер кала, ә уттан бернәрсә дә калмый. Мондый кайгы җиле беребезнең дә ишеген какмасын, бәла-казалардан Ходай үзе сакласын дигән теләктә каласы килә. 
Кышка кергәндә йортсыз, җирсез калган Рәфидә Шәриповага ярдәм итәргә теләүчеләр өчен реквизитлар калдырабыз.
Сбербанк картасы Рәмзия апа исемендә, 8950 318 38 69 телефон номерына беркетелгән. 

Фото: Әтнә таңы