Май бәйрәмнәрен җырчылар ничек уздыра?

Айдар Галимов, җырчы:
– Бүген-иртәгә Мәскәүдән кызларым кайтачак. Оныкның кайтканын аеруча сагынып көтеп торабыз. Алар белән бергәләп авылга кайтырга иде.
Бер дустым туган көнен Төркиядә уздыра, бәлки Зилә белән анда да барырбыз. Аннары, эш тә онытылмый: «Хыял» программама нокта куеп, Уфада һәм Казанда узачак концертларга да әзерләнәсе бар.

Гүзәл Уразова, җырчы:
– Май бәйрәмнәрен ел да туган ягымда – Бардада уздырабыз. Быел бишенче тапкыр өстәл теннисы буенча чемпионат уздырачакбыз. Аның белән беррәттән, мәдәни чаралар да үрелеп барачак. Анысы эш кебек тә түгел, чөнки янымда барлык якыннарым булачак. Ялларны балалар белән уздыру – үзе бер рәхәт!
– Май бәйрәмнәрендә туган йортта барлык туганнар белән җыелышып, ит кыздырырга да исәпләп торабыз. Һава торышы гына матур булсын иде! Яңгыр барыбер кәефне төшерә.

Рөстәм Галиев, җырчы:
– Һава торышы әлегә сөендерерлек булмаса да, майны бик җылы булыр дип көтәм. Май башында Ләйләнең әти-әнисе янына авылга кайтып килергә исәпләп торабыз. Аннары гастрольләрне дәвам итеп, тәмамлап куясы бар.
Ә май ахырында диңгезгә барабыз. Ел дәвамында, эшкә чыгып китәр алдыннан, балаларга: «Бераз түзегез, без акча эшлибез дә, аннары диңгезгә барырбыз», – дип ышандырдык. Хәзер алар шул диңгез турында гына уйлыйлар. Кечкенәсенең теле ачылып кына килсә дә, ул море сүзен «моле» дип кабатлап йөри.

Зифа Нагаева, җырчы:
– Татарстанда концертларым булачак, гастрольгә чыгам. Аннан кайткач, Уфадагы һәм авылдагы йортларның бакчаларын тәртипкә саласы бар. Минем бит йортым икәү! Фатирда яшәүне күз алдына да китерә алмыйм, шуңа күрә Уфа үзәгендә дә үз йортым белән яшим. Фатирда, беренчедән, миңа кысан. Икенчедән, төннәр буена җыр иҗат итәм. Шәһәр йортында төнлә музыка уйнатсаң, күршеләр шундук ишек шакый башлый.
Май бәйрәмнәрендә оныгымның туган көне дә әле! Аны тәбрикләргә барлык туганнар белән җыелабыз, өстәл корып, шашлыклар пешерәбез.