Мәгариф министры: «Нәчәлник булып, «Волга»да утырып йөрисем килде»

Әлбәттә инде, укучы балалар беренче чиратта Рафис Борһановның бала вакыттагы хыялы, мәктәптә укыган чорда нәрсәләр белән мавыгуы, нинди предметларны яратып укуы белән кызыксынды. Аларның сорауларына җавап биргәнче, иң элек аларның үзләре белән танышып чыгарга булды министр. Аңа кунакка килгән балаларның барысы да диярлек җыр-бию, шигырьләр язу белән шөгыльләнә, журналист булу хыялы белән яшиләр булып чыкты. Арадан бер кыз гына хоккей уйнавы турында әйтте. Аларны тыңлап бетергәннән соң Рафис Борһанов, сезнең арада математиклар, физиклар юкмыни, дип сорап куйды. Бактың исә мәктәптә укыганда, ул физика белән нык кызыксынган булган. Шахмат уйнарга яраткан, спортны да үз иткән. Ә инде үсеп җиткәч, «Волга»да йөри торган нәчәлник булырга хыял­ланган.

– Хыяллар ике айга бер үзгәреп тора иде. Космонавт та, полярник та, очучы да булу теләге бар иде. Ул вакытта авыл балалары ишеткән яңа сүз, һөнәрләр шул иде, – диде ул.
Авыл дигәннән, сүз арасында берничә тапкыр беренче президентыбыз Минтимер Шәймиевнең дә, Рөстәм Миңнехановның да, башка бик күп галим, академикларның да авыл мәктәбен тәмамлап, югалып калмаулары турында әйтте.

– Берничә көн элек кенә Минтимер Шәймиев белән университетта педагогик белем бирүнең үзенчәлекләре белән таныштык. Шунда мин аның әле дә формулаларны истә тотуына, математика буенча белеменең ныклыгына сокландым. Ул чит илдә дә, Мәскәүдә дә укымаган югыйсә. Белем алуның сыйфаты укытучыдан һәм укучының кызыксынуыннан тора, – диде Рафис Борһанов.

Укучылар, аның күптән түгел БДИ тапшыруын искә алып, аңардан соңгы хис-кичерешләре, нинди фикердә калуын да сорарга онытмадылар. Министр БДИны икенче ел рәттән бирүен, шул рәвеш­ле имтихан бирүнең техник якларын сынап каравын әйтте. Үзең күрмәгән әйбер турында сөйләп булмый бит, шуның өчен махсус имтихан бирү процессы белән танышып кайттым, диде ул. Шул ук вакытта БДИ буенча фикерләрнең күп булуын, әмма әлегә аңа альтернатива юклыгын да ассызыклап үтте.
Укучыларны ныклы белем­нәр алырга чакырып, акыллы башны таза гәүдә генә тотуын да әйтеп, компьютер, смартфоннарга ябышып ятмыйча, ишегалдында хоккей, футбол уйнарга чыгарга да өндәде. Хәзер моның өчен бөтен мөмкинлекләр дә бар, дип өстәде.

Әдәбият, шигырь белән кызыксынучылар Рафис Борһановтан яраткан шагыйрьләре, язучылары турында да сорашты. Берәр шигырьне яттан сөйләп бирүне дә үтенделәр. Министр абыйлары аларга Тукайның «Шүрәле»сеннән өзек укыды.

Ялкын/ Илназ Мөхәрләмов фотолары