«Милли уку йорты теләсә нинди җәмгыятьтә булырга тиеш»

 Институт директоры Ким Миңнуллин әйтүенчә, әлеге институт, Татарстан мәгариф министрлыгы белән берлектә, яңа буын татар теле һәм әдәбият дәреслекләре әзерләүдә дә катнашачак.

– Татар телен һәм әдәбиятын укыту соңгы арада аерым, үзенчәлекле юнәлеш алды. Институт фундаменталь фән белән шөгыльләнә. Бездә чыккан хезмәтләр дәреслек һәм хрестоматияләр эшләүдә нигез булып тора. Моңарчы да аерым галимнәр дәреслекләр эшләүдә катнашып килде. Ә соңгы елларда бу мәсьәлә белән максатчан рәвештә шөгыльләнә башладык, – диде Ким Миңнуллин матбугат очрашуында.
Узган ел институтта милли мәгариф бүлеге төзелгән. Алга таба әлеге бүлек тулы канлы булып эшләргә ниятли.

– Педагогика юнәлешендәге милли уку йорты теләсә нинди җәмгыятьтә булырга тиеш дип саныйм. Анда бүген һәм иртәгә җавап бирерлек кадрлар әзерләү мәсьәләсе куелырга тиеш. Мәктәпләргә милли кадрлар әзерләү мәсьәләсе иң катлаулы юнәлеш булып тора. Нинди генә методика һәм дәреслек әзерләсәк тә, бүгенге көн таләбенә җавап бирердәй кадрлар булдыру зарур, – ди институт директоры.
Институт директорының фәнни эшләр буенча урынбасары Олег Хисамов сүзләренчә, Тел, әдәбият һәм сәнгать институты интернет киңлекләрен яуларга җыена, уку йорты әзерләгән сүзлекләрнең электрон варианты да булачак.

– Тиздән ике зур электрон проект тәкъдим ителәчәк. Алар – Татар теле сүзлекләренең лексикографик фонды һәм Татарстан Республикасы топонимнарының электрон каталогы. Рус-татар сүзлеге, Орфографик сүзлек, Яңа сүзләр сүзлеге, Орфоэпик сүзлек һәм башка сүзлекләрнең яңа басмалары әзерләнә. Институт проектларының бер өлеше «2014-2020 елларга Татарстан дәүләт телләрен һәм Татарстан Республикасында башка телләрне саклау, өйрәнү һәм үстерү» дәүләт программасы уңаеннан гамәлгә ашырыла, – диде Олег Хисамов. 

Сүз уңаеннан: Татарстанда татар теле һәм әдәбияты яңа буын дәреслекләр булдыру Татарстан Президенты юлламасын тормышка ашыру буенча республика хөкүмәте комплекслы планында күрсәтелгән. Мәгариф һәм фән министрлыгы быел татар теле һәм әдәбияты буенча яңа уку әсбаплары эшләргә тиеш.