#Язмалар 09 апрель 2021, 12:00

“Минем Тукай — 135”кә син дә кушыл!

09 апрель 2021, 12:00

Апрель җитүгә татар дөньясы Габдулла Тукайга багышланган чаралар уздыра башлый. Өстәвенә быел бөек шагыйребез тууына 135 ел тула. Шуны да истә тотып, Казан федераль университетының Филология һәм мәдәниятара багланышлар институты каршында оешкан “Созвучие” студентлар хоры “Минем Тукай — 135” дип аталган флешмоб башлап җибәрде.

Скопировать ссылку

Флешмобның үзенчәлеге шунда — ул Тукай белән бәйле урыннарда үткәрелә. Хор, мисал өчен, Казан метросының Габдулла Тукай исемен йөртә торган станциядә чыгыш ясады. 40 кешедән торган төркем шагыйрьнең иң популяр һәм татар халкының рәсми булмаган гимнына әверелгән “Туган тел”не башкарды.

Институтның татар әдәбияты кафедрасы мөдире, филология фәннәре докторы, профессор Флера Сәйфуллина билгеләп үткәнчә, башка чаралар кебек үк, флешмоб та шагыйрьнең иҗатын популярлаштыру, аны халык арасында тарату, игътибарны арттыру, татар әдәбиятына, Тукай иҗатына мәхәббәт тәрбияләү.

Чара 26 апрельгә кадәр дәвам итәчәк. Моның өчен Габдулла Тукай иҗат иткән әсәрне укып, видеога яздырырга һәм социаль челтәрдә #минемтукай135 хэштегы белән урнаштырырга кирәк. КФУ хэштегын да куярга онытмаска. Видеоның 3 минуттан артмавы шарт итеп куела. Яшь чикләүләре юк. Шулай ук видеоның Тукай белән бәйле урында язылуына да игътибар итәчәкләр.

- Иң эчтәлекле, иң иҗади, сәнгатьле итеп эшләнелгән эшләр билгеләп үтеләчәк, университет сайтында урнаштырылачак, - диде Флера Сәйфуллина. Шулай ук катнашучыларны грамоталар белән бүләкләү күздә тотыла.

Лилия ЛОКМАНОВА

Кызыклы яңалыкларны күзәтеп бару өчен безнең МАХ каналына кушылыгыз.