Министр Айрат Хәйруллин: «Антеннасы алмаштырылмаган, приставка куелмаган телевизорлар федераль каналларны күрсәтмәячәк»

“Татар-информ” мәгълүмат агентлыгында узган матбугат конференциясендә республиканың Дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин кисәткәнчә, 22 мең телевизорның “игълан тактасы”на әверелеп калуы ихтимал.

- Антеннасы алмаштырылмаган, приставка куелмаган иске телевизорлар 14 октярьдән соң цифрдагы федераль каналларны гомүмән күрсәтмәячәк, экранда язу һәм телефон гына булачак. Шунлыктан, ахыргы көнне көтеп йөрергә кирәкми, телевизорларны цифрлы телевидение таләпләренә көйләү мәслихәт, - диде министр Айрат Хәйруллин.

Татарстанда 157 торак пунктта цифрлы телевидение күрсәтә алмый яки эфир начар кабул ителәчәк. Әлеге торак пунктларда яшәүчеләргә спутник антеннасы сатып алу өчен дәүләттән 7300 сум акча бирелә. Шулай ук, республикада 3 һәм аннан күбрәк бала үстергән гаиләләргә, 20 мең сумнан азрак пенсия алган ялгызак пенсионерларга, инвалид бала тәрбияләүчеләргә дә субсидия каралган. Антенна өчен 1 мең сум һәм приставка өчен тагын 1 мең сум акча бирелә. Тулырак белешмәне социаль яклау органнарыннан һәм 8-800-222-87-16 телефоны аша алырга мөмкин.

Телевизорыгыз экранында федераль канал, мәсәлән, “1”нче канал логотипы янында “А” хәрефе торса, сез аналог форматындагы телевизион тапшыруларны карыйсыз. 2013 елдан элегрәк ясалган телевизорларның күбесенә DVB-T2 стандарты көйләнелмәгән, шунлыктан, яңа телевизор яки DVB-T2 стандартлы приставка сатып алырга туры килә. Телевизор 2013 елдан җитештерлгән булса, аларга приставка кирәкми.
Антенна дециметрлы яки барлык дулкынлы (всеволновая) булырга тиеш.
-Соңгы араларда республикада 12 мең телевизор һәм 46 мең приставка сатылган. Цифрлы каналларны тотарга яраклы приставканың уртача бәясе 1 мең сум. Складларда приставкалар һәм антенналар запасы тиешле саннан да күбрәк. Приставкаларны төрле имеш-мимешләргә ышанып, кыйммәт бәядән сатып алмагыз. Телевизорларны көйләргә ярдәм күрсәтү өчен 2 меңнән артык волонтер әзерләнде, аларга бернинди акча түләргә кирәкми. Әгәр акча сорыйлар икән, димәк, алар волонтерлар түгел,-дип искәртте министр Айрат Хәйруллин.

“Кайнар элемтә” телефоны: 8-800-222-87-16, Казанда 063 кыска санны җыеп та шалтыратып була. Әлеге телефоннар аша цифрлы телевидениегә күченү мәсьләсендәге сорауларны җиткерергә, волонтер чакыртырга мөмкин.

Автор фотолары