Минзәләдә янгын: «Берничә пар кием, документларны гына алдык. Кире керерлек түгел иде инде...»

Өй белән бергә Салиховларның төп яшәү чыганагы булган келәмнәр юдыру цехы да, автосервис белән шиномонтаж да көлгә әйләнә.

Дания дә, Рамил дә намазда. “Бу - Аллаһның сынавы. Безгә шуны үтәргә кирәк булган. Ничек кенә авыр булса да, сабыр итәргә тырышабыз. Кемгә нинди ярдәм кирәк, һәрчак булыштык. Ә хәзер үзебезгә ярдәм сорарга туры килә”, - диләр алар. Салиховлар өч бала үстерә. Олы уллары Мусага 16 яшь. 9 нчы сыйныфны тәмамлаганнан соң, әти-әнисе белән цехта эшләгән. Кечкенәләре – игезәкләр Мәдинә белән Мостафага 2 яшь тә 8 ай.

Каза буласы төндә гаилә башлыгы Рамил үзенең әнисендә кунарга кала. "Ул төнне нишләптер йоклап китә алмадым. Балалар янында боргаланып яттым да төнге икеләрдә зал ягына чыгып киттем. Анда ничектер йокыга киткәнмен. Берзаман ишек каккан тавышка уянып киттем. Башта ачарга курыктым. Төнге дүрттә юньле кеше йөрмәс дим. Кабат-кабат дөбердәткәч, камерадан карадым: капка төбендә машина тора. Юкка гына дөбердәтмидер дип, куркып кына ачтым. Гараж ягыгызда төтен дигәнен ишетүгә, тиз генә олы улымны уяттым. Тиккә генә зал ягына күчеп ятмаганмын икән, балалар ягында ишек тавышын ишетмәгән дә булыр идем. Аллаһы Тәгалә безне шулай саклап калган. Ә ул кеше очраклы гына үтеп барган таксист булган, - дип сөйли ул. - Ванна бүлмәсен ачып җибәрдем – төтен. Кухнядан ут чыбыклары янган ис килә. Мин - иремә, улым янгын сүндерүчеләргә шалтыратты. Кечкенә балаларны одеялга төреп алып чыктым. Кайнана бездән ерак яшәми, ул арада ирем дә кайтып җитте. Берничә пар кием, документларны гына алдык. Кире керерлек түгел иде инде".