Мәктәп укучыларына билге кую кирәкме?

Рәхимә Арсланова, Казан шәһәренең Абдулла Алиш исемендәге 20нче гимназия директоры: 
– Һәр кешенең дә үзенең тырышлыгы, гамәлләре өчен бәя аласы килә. Начар билгеләр баланың психикасына тискәре йогынты ясамасын өчен, беренче сыйныфта болай да билгеләр куелмый. Ә гомумән, башлангыч сыйныфларда билгеләр кую системасын калдырырга кирәк дип саныйм. Еллар буе сыналган, кирәклеген раслаган бәяләү системасы калырга тиеш. Дөрес, бәлки кайбер үзгәрешләр кертергә кирәктер. Әйтик, үзем 35 ел мәгариф системасында эшләп, 35 «икеле» куйганым булдымы икән? «Икеле» ул кешене пычрата, бәясен төшерә кебек. Шуңа укучыларыма да: «Мине «икеле» куярга мәҗбүр итмәгез»,– дия идем. Укучыга һәрчак начар билгене төзәтү мөмкинлеге бирергә кирәк дип уйлыйм.

Айзат Кәримуллин, газета укучыбыз, Азнакай: 
– Без укыганда, беренче сыйныфта «йолдызчык»лар, «флаг»лар куялар иде. Һәр укытучының да яраткан укучылары була бит. Аларга гел «бишле»ләр тезәләр, ә тәртипсезләр рәтенә кергәннәргә «өчле»дән артмый. Кыскасы, билгеләр куюны кирәк түгел дип саныйм. Яшүсмернең күңеле бик сизгер. «Икеле» алган өчен әти-әни дә ачуланса? Билге аркасында асылынып үлүчеләр дә булды бит.

фото: pixabay.com