"Һөнәр" фестивале: спектакльләрдә сүгенмиләр, әмма 18+

Менә өченче тапкыр инде аны Г.Кариев исемендәге Казан татар дәүләт яшь тамашачы театры үткәрә.

Татарстан мәдәният министры урынбасары Ленар Хәкимҗанов билгеләп үткәнчә, театрлар өчен быел бик уңышлы ел. Пандемия шартларында эшләүләренә дә карамастан, республиканың яктылыкка һәм нурга илтә торган бу мәдәни учреждениеләренең 7 спектакле ил күләмендә иң дәрәҗәле саналган “Алтын битлек” премиясенә дәгъва кыла. Ә 13 спектакль лонг-биткә кертелгән.

“Һөнәр”гә килгәндә, ул 30 ноябрь көнне С. Өметбаев исемендәге Минзәлә татар дәүләт драма театры сәхнәсендә “Җинаять һәм җәза” спектакле белән башланып китәчәк. Башка спектакльләр Казан театрлары сәхнәләрендә күрсәтелә. Рәсми ачылыш 1 декабрьгә билгеләнгән һәм шул ук көнне чараны оештыручы Кариев театры тамашачыга режиссер Марфа Горвиц куйган “Камыр батыр”ны тәкъдим итәчәк.

“Быел фестивальдә Татарстан театрлары, Санкт-Петербург (“Суббота” театры — авт), Казахстанның Акмолинск шәһәреннән өлкә рус драма театры килергә тиеш. Алты көн дәвамында 11 коллектив заманча һәм үзенчәлекле спектакльләрен тәкъдим итәчәк. Бу аралашу мәйданчыгы да булып тора”, - диде Ленар әфәнде.

Спектакльләр Кариев, Өметбаев, Камал театры сәхнәләреннән тыш, Казан яшь тамашачы театрында, “Әкият” Татар дәүләт курчак театры сәхнәләрендә дә күрсәтелә.

Фестивальнең нигезләмәсе буенча, катнашучы режиссерлар 35 яшькә кадәр булырга һәм алар дебют эшеннән соң 5 ел дәвамында куелган спектакльләрен тәкъдим итәргә хокуклы.

“Һөнәр” дә спектакльләр генә күрсәтелми, ә белгечләр белән фикер алышулар, түгәрәк өстәлләр, иҗади очрашулар да планлаштырылган.

Министр урынбасары киләчәктә фестивальнең форматын яңарту бурычы торуын да ассызыклады.

Кариев театры директоры Луиза Шарова сүзләренчә, бу мәйдан яшьләргә бирелгән икән инде, яшьләр өчен актуаль булган темаларга игътибар бирү кирәк.

“Фестиваль форматын уйлаганда алга таба без яшь режиссерларны, режиссура өлкәсендә генә түгел, башка юнәлештәге яшь белгечләрне, сәхнә өчен кирәкле хезмәткәрләр әзерләү форматын булдыру да кирәктер дигән нәтиҗә ясадык. Чөнки режиссер спектакльне сәхнәгә чыгарсын өчен тулы бер иҗат төркеме, техник белгечләр эшләргә тиеш”, - дип планнар белән бүлеште Луиза Шарова.

Моннан тыш, яшьләр белән тәҗрибә уртаклаша алырлык урта һәм өлкән буын режиссерларын чакыру да комачау итмәс иде, дигән фикерен җиткерде Кариев театрының баш режиссеры Ренат Әюпов. 

“Фестивальдә катнашкан спектакльләрне карап чыктым. Аларда традицион булмаган кыйммәтләр, агрессия булмасын дип карадым. Шулай ук сүгенү сүзләре булмавы әһәмиятле. Андый нәрсәләрнең берсе дә булмаячак — сезне инандыра алам. Спектакльләрне бу яктан контрольдә тоттым”, - ди Әюпов. 

Фото: Г. Кариев театры сайтыннан алынды