Нурлат шәһәрендә янгын: ялгыз ханым 4 баласы белән урамда калган

Кыш уртасында күп балалы гаиләнең йорты көлгә әйләнүе кызганыч. 
Без шалтыратканда Гөлия күршеләрендә иде. Шок хәлендә. 
- Йортыбыз ике катлы. Балалар да йокыларыннан торган, барыбыз да беренче катта кайнаша идек. Олы кызым Мәрьям мәктәптә, аңа 12 яшь. Әмин улыма – 6, Әмирәгә – 4, Рәйхан улыма 2 яшь кенә әле. Икенче каттан төтен исе килә башлады, ул да түгел, беренче катка болыт кебек төтен таралды, ә өстә нәрсәдер чатыр-чытыр килеп, дөрләп янарга ук кереште. Балаларның кечкенәсен генә юрганга төрдем дә, Әмин белән Әмирәгә кулыма нәрсә эләкте шуны киертеп, җыйнаулашып ишегалдына йөгереп чыктык. 112 хезмәтенә шалтыратып, адресымны, агач йорт януын әйтергә генә өлгердем, телефонымның зарядкасы беткән иде, сүнеп тә китте. Балаларны тиз генә күршеләргә кертеп куйдым. Әйләнеп чыксам ялкын телләре йортны тулысы белән чорнап алган, эченә керерлек тә, якын да барырлык та түгел иде... Мин кабат күршеләргә кереп егылдым, – ди Гөлия ханым.
Янгынның ни сәбәпле килеп чыгуы да әлегә билгеле түгел. Гөлия аны ире белән бергә яшәгәндә, 2019 елны ипотекага сатып алган. Әле тагын 11 ел түлиселәре бар. Иң әрнеткәне – йорт иминиятләштерелмәгән. Ире белән аерылышканнар. Элекке тормыш иптәше йорт хуҗасы булу сәбәпле, Гөлия йортны иминиятләштерә дә алмаган. 
- Декабрь аенда гына күрше урамда бер йорт янып китте. Шул вакытта: “Әй, Аллаһым, безнең йортка гына ут капмасын, шырпы тартмасы кебек янып бетәчәк. Төнлә янгын чыкса, балаларны да алып чыгып өлгерә алмаячакмын”, – дип уйлаган идем. Ике катлы йортыбыз агач бүрәнәдән салынган иде, шуңа тиз янып та бетте, – ди хуҗабикә. 
Балаларны, бертуган энесе белән авылда яшәүче әти-әнисе янына кайтарып куйган. Аерылган иренең юлда булуын, кайтып килүен дә әйтте. Берүзе 4 бала тәрбияләүче 30 яшьлек Гөлия шушы көннәрдә генә эшкә дә урнашып йөргән. Зур сынау килгән бу ханымга ярдәм итсәк иде. Гөлиянең 89534065797 телефон номеры әтисенең Сбербанк картасына беркетелгән (Ирек Хамзинович П.)