Окоптамы, яки күнекмәләр вакытындамы, җыр аның юлдашы

Социаль челтәрләрдә эленгән видеоны кем генә карамый калды икән, хәтта ул күрше республикага чаклы барып җиткән.
Аның моңлы тавышына сокланмаган кеше калмады. “Шундый итеп җырлый, елый-елый карадым”, – дип тә язучылар да бар.
Хәзерге вакытта Илгиз Мөхәммәтҗанов Казанда хәрби өйрәнүләрдә. Илгиз Кама Тамагы районының Келәнче авылында дөньяга килгән. Биредә урта мәктәпне тәмамлаган.

«Кечкенәдән үк сәхнәдән төшмәдем, дисәң дә ялгыш булмас, – дип сөйли җырчы егет үзе. – Мәктәптә музыка укытучыбыз Гүзәл Ирековна безне җырларга өйрәтте. Аның ярдәме белән сәхнәгә чыктым. Авыл клубы, мәктәптә узган чараларда катнашмый калмадым. Тавышың бигрәк матур, җырла әле тагын, дип сәхнәдән төшермичә, җырлавымны кат-кат сорыйлар иде. Ничә ел дәвамында “Созвездие-Йолдызлык” фестивалендә катнаштым. Айдар Галимовның “Моңнар кайтсын авылга” дип аталган җырының көен тавышыма туры китереп район мәдәният йортында яздырганнар иде. Урта мәктәпне тәмамлагач, Буа һөнәри техникумында дүрт ел газчыга укыдым, монда да җырлавымны ташламадым. "Буа егетләре" дип аталган ансамбль бар иде, аның составында солист булдым. Казанда филармония, “Пирамида”да чыгыш ясадык.

Уку йортын тәмамлаганнан соң, Илгизне 2018 елда армия сафларына алалар. Хезмәтен Свердловск өлкәсе Елань шәһәрендә башлый, аннан соң аны Псковтагы десант — штурм дивизиясенә күчерәләр. Хәрби хезмәттән кайткач та, ике ел Казанда сәүдә өлкәсендә эшләп ала. Әтисе авыл хуҗалыгы тармагында үз эшен башлап җибәргәч, улын да үзе янына чакыра. Кайда гына булмасын, Илгиз музыкага тартыла. 

— Мобилизация игълан ителгәч, миңа да повестка килер дип көткән идем үзе. 24 октябрьдә хәбәр килде, 25 октябрь көнне иртән сигездә киттек. Без “Казан Экспо”да яшибез. Бар да яхшы. Килгәч тә мотоукчылар полкына билгеләделәр. Өйрәтүләрнең дәрәҗәсе шактый югары, дип бәяләр идем. Армиядән нык аерыла. Төгәллеккә, коралны ничек тотарга, урнашу урынын (позиция) ничек тиз алыштырырга, төгәллеккә һәм төз атарга өйрәтәләр, – ди Илгиз. 

Окоптамы, яки күнекмәләр вакытындамы, җыр аның юлдашы. Саф, чиста тавышлы егетнең җырлары һәркемнең күңел кылларын тибрәндерә.
– Башкортстаннан “служак” егет шалтырата, син бездә чын «йолдыз»га әверелдең, ди. Алай ук популярлашырмын дип уйламаган идем. СМСлар бик күп килә. «Бик матур җырлыйсың», «Исән-имин йөреп, тизрәк әйләнеп кайтыгыз»,  – диләр, рәхмәтләр әйтәләр, – ди Илгиз.