Пенсия фонды халыкны кабул итүне туктата: бу хезмәтне күпфункцияле үзәк күрсәтә башлый

Катлаулы вәзгыятьтә үзәкнең нинди шартларда эшләве һәм, гомумән, биредәге яңалыклар турында журналистларга Татарстанда дәүләт һәм муниципаль хезмәтләр күрсәтә торган күпфункцияле үзәк директоры Ленара Мозаффарова сөйләде.

Аның әйтүенчә, кайбер хезмәтләр кеше шәхсән үзе мөрәҗәгать иткәндә генә күрсәтелгәнгә күрә, халык тарафыннан күп санлы шикаятьләр кабул ителгән. “Халык мәнфәгатьләрен кайгыртып, күпфункцияле үзәкнең барлык офисларын ачуны сорап Татарстан Хөкүмәтенә мөрәҗәгать иттек. Шулай итеп, 13 апрельдән үзәк ачылды, әмма биредә бары тик дистанцион рәвештә башкарылмый торган хезмәтләр генә күрсәтелде. Әлбәттә, моның өчен алдан язылу таләп ителде”, - ди Ленара Мозаффарова.

Ләкин халыкны алдан язылу аша кабул итү берникадәр кыенлыклар китереп чыгарган. Әйтик, элек үзәк көненә 14 мең кешегә хезмәт күрсәтсә, пандемия чорында биредә нибары 7 мең кеше генә кабул ителгән. “Моннан тыш, алдан язылучыларның 30 проценты килмәве ачыкланды. Шул сәбәпле, без чират торучыларны да кабул итә башладык. Нәтиҗәдә үзәк көненә 12 меңләп кешегә хезмәт күрсәтә алды”, - ди Ленара ханым. Үзәккә килергә теләүче халык күп булу сәбәпле, Казан һәм Чаллы шәһәрләрендә чират сату очраклары да күзәтелгән.

Моны истә тотып, Татарстан Хөкүмәтенә кабат мөрәҗәгать юлланган. Нәтиҗәдә ТР Министрлар Кабинеты карары нигезендә күпфункцияле үзәк 15 июньнән тулы көченә эшли башлады. Әгәр узган ел үзәктә 205 хезмәт күрсәтелгән булса, быел бу сан 254не тәшкил итә. “Мөрәҗәгатьләр төрле өлкәгә бәйле. Әйтик, 35 мең ана “Путин” акчасын алырга теләп үзәккә мөрәҗәгать итте. Аутентификация һәм идентификация бердәм системасы хезмәте буенча 200 меңнән артык кеше кабул ителде”, - диде Ленара Мозаффарова.

Шуны да әйтергә кирәк, тиздән үзәктә яңа хезмәтләр күрсәтелә башлаячак. Пенсия фондында кабул итү пунктлары ябылу сәбәпле, моңа бәйле хезмәтләрне күпфункцияле үзәк башкарачак. Гомумән алганда, биредә ай саен яңа хезмәт өстәлеп тора икән.

Күпфункцияле үзәкнең бары тик Җиңү проспектындагы офисында гына автомобильне исәпкә кую хезмәте күрсәтелә. Шулай ук үзәктә машина йөртү таныклыгын алмаштыру яки аны югалткан очракта, яңаны ясату мөмкинлеге дә бирелә. Сүз уңаеннан, үзәктә паспорт өчен фотога төшү хезмәт дә тәкъдим ителә. 

Эльвира ШАКИРОВА