Пенсиягә чыгу хокукы булган педагоглар исемлеген тулыландырырлармы?

Аерым алганда депутатлар вакытыннан алда пенсия алу хокукына ия педагог хезмәткәрләр исемлегенә балалар иҗтимагый берләшмәләре белән тәрбия һәм үзара хезмәттәшлек буенча мәктәп директорлары киңәшчеләренең кертергә, шулай ук рус, туган һәм чит телләрне өйрәтү буенча балалар бакчалары тәрбиячеләренә дә мондый хокук бирергә тәкъдим итә.
Дәүләт Советының мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова сүзләренчә, “Мәрхәмәт” берләшмәсе депутатлары уздырган кайнар линия барышында Мамадышта яшәүче бер кешедән балалар бакчасының штат расписаниесендә туган телләрне өйрәтү буенча тәрбияче дип язылган тәрбиячеләрнең вакытыннан алда пенсиягә чыгу хокукы булмавы турында мөрәҗәгать килеп ирешкән. 
–    Мәгариф министрлыгы һәм Татарстанда Кеше хокуклары буенча вәкаләтле вәкил белән берлектә бу мәсьәләне карап, Татарстанның һәм илнең башка берничә субъектында мәктәпкәчә белем бирү учреждениеләрендәге штат расписаниесендә чынлап та тәрбияче вазифасы белән параллель рәвештә рус, туган һәм чит телләрне өйрәтү буенча балалар бакчалары тәрбиячеләре дә булуы ачыкланды. Һәм исемлектә булмау сәбәпле, алар пенсиягә иртәрәк чыгу хокукына ия була алмый булып чыкты. Югыйсә һәр ике вазифа да бер үк эшне башкара. Шул рәвешле бу мәсьәләне федераль дәрәҗәдә хәл итүне сорыйбыз, – диде Людмила Рыбакова.
Узган елның сентябрендә, Россия Президенты Владимир Путин йөкләмәсе нигезендә, Россиянең 45 төбәгендә балалар иҗтимагый берләшмәләре белән тәрбия һәм хезмәттәшлек буенча мәктәп директоры киңәшчесе вазифасы кертелүен, ә 2023 елда уку елыннан мондый белгечләр илнең барлык мәктәпләрендә, техникумнарында һәм көллиятләрендә, шул исәптән Татарстанда да барлыкка киләчәген ассызыклап, мондый вазифаның да, педагогик хезмәткәр категориясенә караса да, вакытыннан алда пенсиягә чыгу хокукын бирә торган исемлектә булмавын искәртте ул. 
–    Шуны истә тотып, вакытыннан алда пенсиягә хокук бирә торган эш стажына кертелә торган вазифалар исемлеген «балалар иҗтимагый берләшмәләре белән тәрбия һәм үзара хезмәттәшлек буенча мәктәп директорының киңәшчесе» вазифасы белән тулыландырырга кирәк, – диде докладчы.