Почтада дару — коткару чарасымы, әллә вакытлы чишелешме?

Авыл кешесе өчен дару — ул гади генә товар түгел. Ул — вакыт, өмет, кайчакта исә гомер белән үлем арасындагы нечкә сызык. Район үзәгенә барып җитү өчен автобус көтәргә, юл акчасы табарга, кар-яңгыр, салкын-эссе белән исәпләшергә кирәк. Шундый шартларда, даруханәгә юл аеруча авыр сынау булып кала. Шуңа күрә “Почта” бүлекчәләрендә дару сату мөмкинлеге турындагы хәбәр күп авыллар өчен чын мәгънәсендә бер өмет чаткысы булып яңгырый.

Сәламәтлек саклау министрлыгы тәкъдим иткән исемлектә — 132 дару. Алар барысы да рецептсыз, махсус саклау шартлары таләп итми торган препаратлар. Дару төймәләре, сыек дарулар, мазьлар — көндәлек тормышта еш кирәк була торган, әмма вакытында табылмаса, зур проблемага әйләнә торган чаралар. Шул ук вакытта психотроп препаратлар, көчле анальгетиклар сатылмаячак — бу мәсьәләдә чикләр ачык куелган.

Әлбәттә, мондый яңалык барысын да шатландырмый. Даруханә бизнесы вәкилләре борчылу белдерә, лицензияләү таләпләренең гадиләштерелүе сораулар уята. Әмма шунысын да онытмаска кирәк: сүз базар өчен көрәш турында гына түгел, ә меңләгән кешенең сәламәтлеккә ирешү мөмкинлеге турында бара. Шуңа да карамастан, дару белән эш итәчәк почта хезмәткәрләренең тиешле белем һәм квалификациягә ия булуы мәҗбүри булып калачак — бу принципиаль шарт.

Почтада дарулар пәйда булу — проблеманы хәл итүнең бер юлы гына.  Дәүләт Думасында күчмә даруханәләр — “тәгәрмәчле даруханәләр” турында закон проекты карала. Моннан тыш, район үзәгеннән ерак урнашкан торак пунктларга медикаментларны дроннар белән китерү мөмкинлеге дә дәүләт гарантияләре программасына кертелгән. Болар барысы да авыл кешесенең район үзәгенә барып интекмичә, үз җирлегендә кирәкле даруны алу мөмкинлеген киңәйтүгә юнәлтелгән.

Ләкин теләк белән чынбарлык арасында һәрвакыт сораулар кала. Логистика ничек оештырылачак? Персоналны кем һәм ничек укытачак? Даруларның сыйфаты ничек контрольдә тотылачак, фальсификаттан (ялган товардан) ничек сакланырга? Яңа ысуллар икътисадый яктан акланырмы?

Бер нәрсә ачык: авыл өчен дару — ул акча эшләү генә түгел, ә ихтыяҗ. Әгәр дә бу башлангычлар ышанычлы, уйланылган һәм намуслы итеп гамәлгә ашырылса, алар авыл тормышын җиңеләйтүгә зур өлеш кертә ала. Авыл кешесе моңа күптән лаек.